चिकित्सा बिज्ञानमा नयाँ उपलब्धीः अब बुढो हुनु नपर्ने

काठमाडौं। चिकित्सा विज्ञानको सबैभन्दा महत्त्वपूर्ण लक्ष्यहरू मध्ये एक बुढ्यौलीलाई उल्ट्याउने औषधिको पहिलो मानव परीक्षण सुरु भएको छ। यो पहिलो पटक हो कि बुढ्यौलीको प्रभावलाई उल्ट्याउने सुई मानिसलाई लगाइएको छ।

बोस्टनमा आधारित बायोटेक स्टार्टअप, लाइफ बायोसाइन्सेसले घोषणा गर्‍यो कि यसको पहिलो बिरामीले सेलुलर रिप्रोग्रामिङ सुई प्राप्त गरेको छ। परीक्षणको भागको रूपमा ग्लुकोमाबाट पीडित बिरामीको एउटा आँखाको नानीमा यो सुई लगाइएको थियो। यस परीक्षणको प्राथमिक लक्ष्य बुढ्यौलीका कारण कमजोर भएका कोषहरूलाई पुनरुत्थान र सक्रिय गर्नु हो। वैज्ञानिकहरूले आगामी ६ महिनामा यसको प्रभावकारिता र साइड इफेक्टहरूको निगरानी गर्नेछन्।

यो प्रविधि मानव शरीरको लागि पूर्ण रूपमा सुरक्षित छ भनी सुनिश्चित गर्न डाक्टर र वैज्ञानिकहरूले अब धेरै महिनासम्म बिरामीलाई नजिकबाट निगरानी गर्नेछन्। थेरापीमा सुरुमा बिरामीको आँखामा एउटा जीन थेरापी इन्जेक्सन समावेश हुन्छ। यसपछि केही हप्ताको लागि एन्टिबायोटिकको विशेष कोर्स दिइनेछ।

यो एन्टिबायोटिक एक पटक शरीरमा पुगे पछि तीनवटा चिकित्सीय जीनहरूको लागि ‘अन स्विच’को रूपमा काम गर्दछ, जसले कोषहरूलाई पुनः प्रोग्रामिंग (पुनरुत्थान) गर्न थाल्छ। पहिला यसले मुसा र बाँदरहरूमा सफलतापूर्वक दृष्टि पुनर्स्थापित गरेको थियो ।

यस थेरापीको लागि मानव आँखा छनौट गरिएको थियो किनभने यो शरीरको बाँकी भागबाट अलग र सुरक्षित छ। यसले साइड इफेक्टहरू निगरानी गर्न पनि सजिलो बनाउँछ। लाइफ बायोसाइन्सेसका सीईओ जेरी म्याकलफ्लिनले भने कि यो उनको कम्पनी वा बुढ्यौली जीवविज्ञानको लागि मात्र नभई समग्र चिकित्सा विज्ञानको लागि सम्भावित रूपमा प्रमुख र परिवर्तनकारी क्षण हो।

यदी यो क्लिनिकल परीक्षण सफल भयो भने यसले बुढ्यौली उपचारमा नयाँ युगको सुरुवात गर्न सक्छ। लक्ष्य भनेको शरीर भरि कोषहरूलाई पुनरुत्थान र सक्रिय गर्नु हो, जसले गर्दा डीएनएले काम गर्ने र उमेर बढ्दै जाँदा आफूलाई अभिव्यक्त गर्ने तरिकामा सुधार आउँछ। अमेजनका संस्थापक जेफ बेजोस र ओपनएआईका साम अल्टम्यान लगायत धेरै प्रमुख लगानीकर्ताहरूले यस प्रविधिमा लगानी गरेका छन्। एली लिली र मर्क जस्ता औषधि कम्पनीहरूले पनि यस विचारमा आफ्नो लगानी बढाइ रहेका छन्। मानव परीक्षण अघि अनुसन्धान मुसा र बाँदरहरूमा सीमित थियो तर अब यो मानिसहरूमा विस्तार भएको छ।