युएईको दुबईबाट नेपाल एयरलाइन्सको दुई उडान, आबुधाबीबाट हिमालयनको दुई उडान (सूचना सहित)

काठमाडौँ | विश्वब्यापी महामारीको रुपमा फैलिएको कोरोना भाइरसको महामारीको कारण युएईमै रोकिएका नेपालीहरुलाई स्वदेश फिर्ता गराउने सम्बन्धमा युएई स्थित नेपाली दुतावासले सूचना जारी गरेको छ । जारी सूचना अनुसार असार २, ४, ६ र ९ गते चार उडान मार्फत पहिलो चरणमा नेपालीहरुलाई स्वदेश फिर्ता ल्याइने भएको छ ।

दुतावासले युएईमा रोकिएर स्वदेश जान नपाएका नेपालीहरुलाई प्राथमिकताको आधारमा फर्काउन लागेको जानकारी दिँदै नेपाल एएरलाइन्सको जहाजले दुबईबाट असार २ र ४ गते दुई उडान गर्ने जनाएको छ । त्यसपछि असार ६ र ९ गते हिमालयन एएरलाइन्सको जहाजले आबुधाबीबाट उडान गर्नेछ ।

दुतावासले प्राथमिकतामा परेका नेपालीहरुले टिकट खरिद नगरे पछिल्ला क्रममा परेकाहरुले टिकट खरीद गर्ने मौका पाउने समेत जनाएको छ ।

यूएईमा समस्यामापरी नेपाल आउन चाहनेहरुले विदेशबाट आउँदाको हवाई शुल्कदेखि क्वारेन्टाइन खर्च समेत आफैले व्यहोर्नुपर्ने नीति लिएको छ । उडानमा प्राथमिकतामा परेकाहरुले प्रतिव्यक्ति ५०० अमेरिकी डलर (लगभग १८३६ दिराम) का दरले टिकट खरिद गर्नुपर्ने भएको छ । सरकारले प्राथमिकता निर्धारण गरेर स्वदेश फिर्ता लैजाने नागरिकलाई झन्डै तेब्बर हवाई भाडामा लैजान शुल्क निर्धारण गरेपछि समस्यामा परेकाहरुले सरकारको चर्को आलोचना गरेका छन् ।

दुतावासले पछिल्लो पटक जारी गरेको सूचना हेर्नुहोस्