सर्वोच्च परिसरभित्र दुई अधिवक्ताबिच कुटाकुट

काठमाडौँ । सर्वोच्च अदालत परिसरभित्र दुई अधिवक्ताबिच कुटाकुट भएको छ । सोमबार दिउँसो सर्वोच्च परिसरभित्र अधिवक्ता किरण जोशी र प्रमोद गुप्ताबिच कुटाकुट भएको हो ।

अधिवक्ताद्वय जोशी र गुप्ताबिच व्यक्तिगत लेनदेनको विषयमा कुटाकुट भएको हो । गुप्ताले जोशीबाट पाँच वर्षअघि १ लाख रुपैयाँ लिएको र सोही रकमको विषयमा कुटाकुट भएको बताइएको छ । अधिवक्ता जोशीले गुप्तासँग पैसा मागेपछि कुटाकुट भएको थियो ।

कुटाकुटबाट जोशीको मुखमा चोट लागेको छ । अधिवक्ता जोशीले पटक पटक पैसा माग्दा पनि गुप्ताले नदिएको आरोप लगाएका छन् । सर्वोच्च परिसरमा नै कुटाकुट भएपछि जोशी प्रहरी समक्ष जाहेरी दिन पुगेका छन् ।