“ओलीको प्रधानमन्त्री प्रस्ताव प्रचण्डलाई गएको हुन सक्छ, माधव नेपाललाई गएको छैन”

काठमाडौं, २३ जेठ । नेकपा (एकीकृत समाजवादी) का नेता एवं सांसद सोमप्रसाद पाण्डेले पार्टीको आन्तरिक समझदारी अनुसार नै मन्त्री फेरिएको बताएका छन् ।
नेपाली रेडियो नेटवर्क (एनआरएन) को कार्यक्रम ‘नेपाली बहस’का लागि पत्रकार ऋषि धमलासँग कुरा गर्दै नेता पाण्डेले भने, “६ महिना बितिसकेपछि मन्त्री बनाउने पूर्वसमझदारी भएका नेताहरुले प्रश्न उठाइरहनुभएको थियो । त्यसअनुसार बजेट अगाडि नै फेर्ने कुरा भएको थियो । यसबारे आंशिक रुपमा आन्तरिक छलफल नभएको होइन । पूर्वसमझदारी अनुसार मन्त्री हेरफेर भएको हो । यसमा मन्त्री साथीहरुले असन्तुष्टि, असहमति र आक्रोश जनाउनुपर्ने आवश्यकता छैन । उहाँहरु नै बेलाबखत ‘६ महिनालाई मन्त्री भैयो’ भनेर रमाइलो गर्नुहुन्थ्यो ।”

मन्त्रीहरुलाई राम्रो काम गर्न नसकेर कारबाही नभएको पनि पाण्डेले दाबी गरे । उनले भने, “यसमा कसैलाई भ्रम नहोस् । हामी स्पष्ट छौं । माधव नेपालले पार्टीका मन्त्रीहरुको कामको प्रशंसा गर्नुभएको थियो । माधव नेपालले सचिवालयबाहिरबाट एक्लो निर्णय गर्नुभएको पनि होइन । सचिवालय सदस्य नभए पनि मैले उहाँ निकट रहेर काम गरेको छु । उहाँ महासचिव हुँदा पनि काम गरेको हुँ । कतिसम्म भने बल्खुमा रिसेप्सेनिस्ट चन्द्र पासवानलाई नियुक्त गर्दा पनि स्थायी कमिटीबाट निर्णय गराउनुभएको थियो ।”
नेकपा (एकीकृत समाजवादी)ले दुई जना गैरसांसदलाई मन्त्री बनाएको पनि उनले स्वीकारे । पाण्डेले भने, “गैर सांसदलाई मन्त्री बनाउने व्यवस्था संविधानमै छ । यसअघि गोविन्द बन्दी कानुनमन्त्री हुनुभयो । अहिले मन्त्री हुन लाग्नुभएको शेरबहादुर कुँवर पनि गैरसांसद हो । उहाँको राष्ट्रिय सभाको पदावधि असोजमासकिएको हो । संवैधानिक व्यवस्था अनुसार ६ महिनाभित्र उहाँहरु सांसद बन्नुपर्छ ।”

पाँच दलीय गठबन्धन तोड्नका निम्ति नेताहरुलाई प्रधानमन्त्री प्रस्ताव गरिएको हुन सक्ने उनले औंल्याए । पाण्डेले थपे, “पाँच दलीय गठबन्धन तोड्नका लागि आश्वासनका पोका फ्याँकिएका हुन सक्छन् । तर, वाम गठबन्धनको परिस्थिति निर्माण अहिलेसम्म भएको छैन । मलाई लाग्छ, संघीय निर्वाचनसम्म यो गठबन्धन टुट्दैन । अन्य पार्टीतिर जान लागेका एमालेका कतिपय नेता कार्यकर्ता विचलित हुन्छन् भनेर हल्ला चलाएको पनि हुन सक्छ । ईश्वर र शंकर पोखरेलले माधव नेपाल र प्रचण्डलाई प्रधानमन्त्रीको प्रस्ताव गरे भनिएको छ । प्रचण्डलाई गएको हुन सक्छ, माधव नेपाललाई गएको छैन । म यो दाबीसाथ भन्न सक्छु ।”