वैवाहिक अंगीकृतको बारेमा नागरिकता विधेयक किन बोलेन? – बिद्या भट्टराई

काठमाडौं । एमाले सांसद विद्या भट्टराईले शुक्रबारको प्रतिनिधिसभामा सरकारले ल्याएको विधेयकका धेरै प्रावधानमा एमालेको असहमति रहेको बताइन् ।

उनले नागरिकता विधेयकमाथिको सैद्धान्तिक छलफलमा भाग लिँदै वैवाहिक अंगीकृतको बारेमा विधेयक नबोलेकोले संशोधन गर्नुपर्ने बताइन् । त्यस्तै, उनले संविधानको धारा १२ मा व्यवस्था भएको वंशीय आधार र लैङ्गिक पहिचान सहितको नागरिकताको सवालमा पनि विधेयकमा स्पष्ट व्यवस्था नभएको बताइन् ।

उनले भनिन्, ‘नेपाली नागरिकसँग विदेशीले विवाह गर्ने हकमा हामीले २ वटा मान्यतालाई स्वीकार गर्नुपर्छ, पहिलो भनेको पारस्परिक समानताको आधार, दोश्रो भनेको अन्तर्राष्ट्रिय प्रचलन । यी दुवै मान्यतालाई यसले स्वीकार गरेको देखिएन् । यसको बारेमा पनि केही प्रश्नचिन्ह उठेका छन् ।’ उनले अहिले सरकारले ल्याएको विधेयकले पनि पितृसत्तात्मक सोचलाई मान्यता दिएको बताएकी छन् ।