साताको अन्तिम दिन दोहोरो अंकले बढ्यो नेप्से, २ अर्ब १९ करोडमाथि कारोबार

काठमाडौं । आज साताको अन्तिम कारोबार दिन शुक्रबार पनि शेयर बजार दोहोरो अंकले बढेको छ ।

आज नेप्से परिसूचक १२.९२ अंकले बढेर २,१४०.३९ को विन्दुमा पुगेको छ । आज १०३ वटा कम्पनीको शेयर मुल्य बढेको छ भने ७१ वटा कम्पनीको शेयर मुल्य घटेको छ । आज दिनभरिमा २१६ वटा कम्पनीको ५१ लाख ११ हजार ३१० कित्ता शेयर किनबेच हुँदा २ अर्ब १९ करोड १६ लाख १९ हजार रुपैयाँको शेयर कारोबार भएको छ ।

यस दिन हाइड्रोपावर समुह, निर्जीवन बीमा समृह र म्युचुअल फण्ड बाहेक सबै उपसूचक बढेका छन् । आज सबैभन्दा धेरै शिवम् सिमेन्टको १२ करोड ८६ लाख रुपैयाँको कारोबार भएको छ ।

यसैगरी, लुम्बिनी विकास बैंकको ९ करोड ३४ लाख रुपैयाँको, नागरिक लगानी कोषको ७ करोड ७९ लाख रुपैयाँको र महालक्ष्मी विकास बैंकको ६ करोडमाथि शेयर कारोबार भएको छ ।

आज सबैभन्दा धेरै रिलायन्स लाइफ र राष्ट्र उत्थान लघुवित्त वित्तीय संस्थाका लगानीकर्ताले १० प्रतिशतका दरले कमाएका छन् । त्यस्तै, लुम्बिनी विकास बैंकका लगानीकर्ताले ८.८४ प्रतिशतका दरले र एक्सेल डेभलपमेन्ट बैंकका लगानीकर्ताले ६ प्रतिशतका दरले कमाएका छन् ।

आज सबैभन्दा धेरै गुमाउनेमा बुद्ध भुमि हाइड्रोपावरका लगानीकर्ता छन् । जसले ३ प्रतिशतका दरले गुमाएका छन् ।