अमनलाल मोदी भारतबाट पेट्रोलको मूल्य घटेर आउँदा यहाँ किन घट्दैन ?

काठमाडौं। पेट्रोलियम पदार्थको मूल्य समायोजन नगरेकोप्रति सत्तारुढ दलका सांसदले नै सरकारको आलोचना गरेका छन् । माओवादी केन्द्रका सांसद अमनलाल मोदीले भारतबाट पेट्रोलियम पदार्थको मूल्य २ पटक घटेर आउँदा पनि सरकारले नेपालमा किन मूल्य समायोजन नगरेको भनेर प्रश्न गरेका छन् । प्रतिनिधिसभाको मंगलबारको बैठकमा सांसद मोदीले तत्काल पेट्रोलियम पदार्थको मूल्य समायोजन गर्नुपर्ने माग गरेका छन् । ‘भारतीय आयल निगमले पेट्रोलियम पदार्थको मूल्य समायोजन गरेर २ पल्ट मूल्यसूची पठाइसक्यो ।

तर नेपाल सरकारको पेट्रोलियम पदार्थको मूल्य घटाएर कुनै समायोजन गरेको छैन,’ उनले भने, ‘भारतले मूल्य बढायो भने सरकारले तुरुन्त बढाउँछ । तर घटेर आउँदा मूल्य नघटनाउने देशमा महंगी बढेको छ । यातायातदेखि हरेक क्षेत्रमा महँगी बढेको छ । यसमा सरकारको ध्यानाकर्षण होस् ।’

त्यस्तै, नेत्रविक्रम चन्द नेतृत्वको नेकपाका नेताहरूमाथि प्रक्राउ पुर्जी जारी गरिएको विषयमा पनि सांसद मोदीले आपत्ति जनाएका छन् । सरकारसँगको सहमतिका आधारमा जेलमा रहेका चन्द समूहका नेता र कार्यकर्तालाई रिहा गर्नुको साटो उल्टै पक्राउ पुर्जी जारी गरिएको भन्दै सरकारको ध्यानाकर्षण गराए । ‘नेकपा विप्लव समूहसँग सरकारले तीन बुँदे सहमति गरेको छ। त्यसको कार्यान्वयनको सट्टा अहिले पनि धरपडक, वारेन्ट जारी भएको छ । यो अदालतको कुरा हो । तर, सरकारसँग वार्ता गरिसकेपछि सरकारले पहलकदमी लिनुपर्छ । जेलमा रहेका बन्दी रिहाइ गरिनुपर्छ,’ उनले भने ।

राजनीतिक बन्दीहरूलाई रिहाइ गर्नका लागि पनि सरकारले ध्यान दिनुपर्ने सांसद मोदीको भनाइ थियो । उनले कैलालीको टीकापुरमा भएको घटनामा संलग्नमाथि लागेका मुद्दा फिर्ता गरी जेलमा रहेकालाई रिहाइ गर्नुपर्ने माग गरेका छन् । राजनीतिक मुद्दा निरुपण ठीक र संवेदनशील तरिकाले हुनुपर्ने उनले सुझाव दिए ।

त्यस्तै, सांसद मोदीले विराटनगर एयरपोर्टलाई क्षेत्रीय स्तरको विमानस्थल निर्माण गर्नका लागि भनेर सरकारले जनताको खेत अधिग्रहण गर्न सूचना जारी गरी रोक्का गरेर राख्दा मर्का परेको बताए । उनले माग गरे, ‘अहिलेसम्म जग्गाको मुआब्जा नदिइएको र फुकुवा पनि नगरिएकाले जनतालाई अप्ठ्यारो परेको छ । कि मुआब्जा दिनपर्छ नभए जग्गा फुकुवा हुनुपर्छ ।’