निर्वाचन आयोगको ‘प्रेस अफिस’ सञ्चालनमा

काठमाडौं । निर्वाचन आयोगले मंसिर ४ गते हुने प्रतिनिधिसभा तथा प्रदेशसभा निर्वाचनका लागि नेपाली सेना र प्रहरीको साइबर ब्युरोका प्रतिनिधिसमेत रहनेगरी सामाजिक सञ्जालदेखि मिडिया अनुगमन गर्ने कार्यालय सञ्चालनमा ल्याएको छ। आयोगको केन्द्रीय कार्यालयमा शुक्रबार ‘प्रेस अफिस’ को उद्घाटन गर्दै प्रमुख आयुक्त दिनेशकुमार थपलियाले सामाजिक सञ्जालमार्फत फैलाइन सक्ने मिथ्या सूचना नियन्त्रणका लागि सुरक्षा निकायका प्रतिनिधिहरूले काम गर्ने बताए।

‘यसपटक साइबर कानुन आकर्षित हुने विषय आयो भने उहाँहरू ९सुरक्षाकर्मी० बाट हेर्न सकिन्छ भन्ने आयोगको बुझाइ हो,’ उनले भने, ‘अरू काममा उहाँहरूको भूमिका छैन। निर्वाचन आचारसंहिताको पालना सञ्चारमाध्यमले गरेनगरेको अनुगमन प्रेस काउन्सिल नेपालले गर्नेछ। आयोगले आमसञ्चार माध्यममा के कस्ता सामग्री आएका छन् र ती निर्वाचनलाई सहयोग पुग्ने छन् कि छैनन् भनेर अनुगमन मात्रै गर्छ।’

सञ्चारमाध्यमको दबाबपूर्ण सहयोगले स्थानीय तह निर्वाचन सफल भएको चर्चा गर्दै उनले डिजिटल र सामाजिक सञ्जालको अनुगमन गरिने बताए। ‘सामाजिक सञ्जालबाट हुन सक्ने दुष्प्रचार, भ्रामक सूचना र द्वेषपूर्ण अभिव्यक्तिलाई नियन्त्रण गर्न तथा निर्वाचनका समयमा साइबर सुरक्षाको चुनौती कम गर्न नेपाल सरकारका सम्बन्धित निकायले गरी आएको कामलाई निर्वाचनका समयमा प्रभावकारी बनाउन आयोगको प्रेस अफिसमा सम्पर्क व्यक्तिका रूपमा सेना तथा प्रहरीका प्रतिनिधि राखिएको छ,’ उनले भने। यसबाट आयोगको सूचना एकद्वार प्रणालीबाट प्रवाह भएर प्रभावकारी तवरले लक्षित वर्गसम्म पुग्ने विश्वास लिइएको छ।

प्रेस अफिस सञ्चालनसम्बन्धी अवधारणापत्रलाई आयोगले गत महिना स्वीकृत गरेको थियो। आयोगले सेना र प्रहरीका प्रतिनिधिसहित मिडिया र सामाजिक सञ्जालको अनुगमन गर्नु लोकतन्त्रको अभ्यास र मान्यताविपरीत हुने टीकाटिप्पणी पनि सामाजिक सञ्जालमा आइरहेका छन्।

निर्वाचनमा मिडियासँग सम्बन्ध सुमधुर बनाउनेदेखि आयोगका गतिविधि सामाजिक सञ्जाल र मिडियामा प्रभावकारी रूपमा सम्प्रेषण गर्न तथा अनुगमनलाई व्यवस्थित गर्न आयोगले प्रेस अफिस सञ्चालनमा ल्याएको जनाएको छ।