चीनले ताइवानमा आक्रमण गरे पुटिनको जस्तै गल्ती हुनेछ : अमेरिकी जनरल

काठमाडौँ । अमेरिकी सेनाका शीर्ष जनरल मार्क मिलेले चीनले ताइवानमाथि आक्रमण गरे रणनीतिक गल्ती हुने बताएका छन् । मार्क मिलेले हाल अमेरिकी सेनाको सर्वोच्च पद, संयुक्त चिफ अफ स्टाफको अध्यक्षको जिम्मेवारी सम्हालिरहेका छन् । चीनले ताइवानप्रति आक्रामकता देखाएको खण्डमा पुटिनको जस्तै गल्ती हुने मिलेको भनाइ छ ।

रुसी राष्ट्रपति पुटिनले यस वर्षको सुरुमा आफ्नो छिमेकी देश युक्रेनमा सैन्य आक्रमण सुरु गरेका थिए, जसलाई उनले विशेष सैन्य कारबाही भनेका थिए। यो युद्ध अहिलेसम्म चलिरहेको छ र निकट भविष्यमा पनि यो द्वन्द्वको समाधान देखिँदैन । यस युद्धका कारण रुसले ठूलो आर्थिक र भूराजनीतिक चुनौती सामना गरिरहेको छ ।

मिलेले भने, ‘ताइवानमाथि आक्रमण र घेराबन्दी गर्नु निकै कठिन काम हो। ताइवानको अधिकांश भूभाग पहाडी छ । यो सैन्य अपरेसनको दृष्टिकोणमा धेरै गाह्रो काम हो । उनले ताइवानको अवस्थामा युक्रेन युद्धबाट पाठ सिकेर आफूलाई रक्षा गर्न अझ राम्रोसँग तयार हुन सक्ने बताए ।

यो शताब्दीको मध्यसम्ममा चीन विश्वको सबैभन्दा ठूलो शक्ति बन्नेतर्फ अघि बढिरहेको मिलेको भनाइ छ। यद्यपि उनले अहिले अमेरिकालाई विश्वको सबैभन्दा ठूलो शक्ति भनेका छन् ।

मिलेले भने, ‘कसैले जति आलोचना गरे पनि अमेरिकी सेना अहिले विश्वकै सबैभन्दा खतरनाक सेना हो भन्नेमा कुनै शंका छैन। अमेरिकी सेना नम्बर एक छ र हामी नम्बर एक रहन चाहन्छौँ ।