अन्तरिक्ष टेलिस्कोपले पत्ता लगायो पृथ्वी जत्रै नयाँ ग्रह

बीबीसी । गत वर्षदेखि सञ्चालनमा आएको जेम्स वेब टेलिस्कोपले कैयौँ नयाँ कुराहरू पत्ता लगाएको छ । यसले एउटा नयाँ उपलब्धि हासिल गरेको छ । अन्तरिक्षमा स्थापित सबैभन्दा ठूलो उक्त टेलिस्कोपले पहिलो पटक एउटा ग्रह पत्ता लगाएको छ ।

उक्त ग्रह पृथ्वीसँग निकै मिल्दोजुल्दो देखिन्छ । वैज्ञानिकहरूले भविष्यमा उक्त ग्रह बारे थप नयाँ कुरा थाहा पाउन काम गर्ने योजना बनाएका छन् ।

वैज्ञानिकहरूले के फेला पारे ?
अक्टान्स तारामण्डलमा अवस्थित उक्त चट्टानी ग्रह पृथ्वीबाट ४१ प्रकाशवर्ष पर छ । उक्त ग्रहको नाम एलएचएस ४७५बी  (LHS 475b)  राखिएको छ । सबैभन्दा पहिला नासाको एउटा भू-उपग्रहले उक्त ग्रह पत्ता लगाएको थियो ।

तर जेम्ब वेबले उक्त ग्रहको अवलोकन गर्दै त्यसको अस्तित्व पुष्टि गरेको हो । यो निकै नयाँ ग्रह भएकाले यस बारे धेरै कुरा जान्न बाँकी छ । तर वैज्ञानिकहरूले केही प्रारम्भिक विवरण दिएका छन् ।

यो ग्रह सानो छ र यसको आकार पृथ्वीको जत्रै छ । तर त्यहाँको तापक्रम पृथ्वीको भन्दा केही सय डिग्रीले बढी भएको वैज्ञानिकहरूले पत्ता लगाएका छन् । वैज्ञानिकहरूको टोलीले उक्त ग्रहमा वायुमण्डल भए नभएको बारे थाहा पाउने प्रयास गरिरहेको छ ।

यद्यपि उक्त ग्रहमा शनि ग्रहको चन्द्रमा टाइटनमा भए जस्तो मीथेन ग्यासको बाक्लो वायुमण्डल नभएको कुरामा उनीहरू विश्वस्त देखिएका छन् । यस उपलब्धिबाट उत्साहित भएका वैज्ञानिकहरूले भविष्यमा अरू ग्रहहरू पनि फेला पर्ने आशा गरेका छन् ।

“पृथ्वीको जत्रो आकारको चट्टानी ग्रहका यी प्रारम्भिक अवलोकनात्मक परिणामले भविष्यमा जेम्स वेबमार्फत् चट्टानी ग्रहको वायुमण्डलबारे अध्ययन गर्न सम्भावनाको ढोका खोलेका छन्,” नासाका निर्देशक मार्क क्लाम्पिनले भने ।

“जेम्स वेबले हामीलाई सौर्यमण्डलबाहिर पृथ्वीसमान संसार भएको नयाँ धारणालाई अझ राम्ररी बुझाइदिएको छ, उनले भने, “हाम्रो अभियान बल्ल सुरु भएको छ ।”

वैज्ञानिकहरूले नयाँ ग्रह बारे थप जानकारी चाँडै पाइने अपेक्षा गरेका छन् । उनीहरूले केही महिनामा थप अवलोकन गर्ने तालिका बनाएका छन् ।