प्रेमीसँग मिलेर श्रीमानको हत्या 

बारा । बाराको पचरौता नगरपालिका वडा नम्बर ६ लक्ष्मीनियामा असोज ९ गते मृत भेटिएका भारतीय नागरिकको हत्या उनकै श्रीमतीको योजनामा भएको खुलेको छ । आफ्ना प्रेमीसँग मिलेर श्रीमानको हत्या गरेको आरोपमा बारा प्रहरीले मृतककी श्रीमतीलाई पक्राउ गरेपछि यो खुलासा भएको हो ।

बाराको पचरौता नगरपालिका ६ लक्ष्मीनियामा अजितकुमार सिंहको हत्या गरेको आरोपमा प्रहरीले उनकी श्रीमती भारत बिहारको मोतिहारी जिल्ला दर्पा थाना १ सुक्लहिया बस्ने वर्ष २३ को सोनम सहनी सिंहलाई पक्राउ गरेको हो ।

बाराको सिम्रौनगढबाट भारत भाग्दै गरेको अवस्थामा उनलाई सीमा क्षेत्रबाट पक्राउ गरिएको बारा प्रहरीले जनाएको छ । सोनमले आफ्नो प्रेमीसँग मिलेर अजितको हत्या गरेको प्रहरी अनुसन्धानबाट खुलेको प्रहरीले जनाएको छ ।

सोनम र उनका प्रेमीले मिलेर असोज ९ गते अजितको लक्षिमनियीस्थित नेपाल-भारतको सीमानाका नजिकै गोली हानी हत्या गरेका थिए । हत्यामा संलग्न रहेका सोनमका प्रेमी भारतको मोतिहारी जिल्ला दर्पा थाना १ सुक्लहिया बस्ने २५ वर्षीय सुजित कुमार सिंह पक्राउ परेका हुन् ।

त्यस्तै, त्यही ठाउँ निवासी २४ वर्षीय चञ्चल पाण्डे, २२ वर्षीय मनिष कुमार सहनी, २० वर्षीय कामेश्वर सहनी र २० वर्षीय रञ्जित मुखिया फरार रहेको प्रहरीले जनाएको छ । भारतीय प्रहरीसँगको समन्वयमा फरार रहेकाहरूको खोजी कार्य भइरहेको छ ।

सोनमले प्रेमी सुजितसँग योजना बनाएर अजितको हत्या गरेकी थिइन् । भारतीयलाई नेपालमा ल्याएर हत्या गरे पक्राउ नपर्ने भन्ने मनसायले उनीहरूले अन्य आरोपितहरूसँग मिलेर बारा जिल्लाको सीमानाका नजिकै ल्याएर अजितको गोली हानी हत्या गरेका थिए ।

सोनमले सुजितसँग आफ्नो अवैध सम्बन्ध रहेको प्रहरीलाई बयान दिने क्रममा स्वीकार गरेका छन् । असोज ९ गते सुजितले अजितलाई आफ्नो मोटरसाइकलमा पछाडि बसाएर भारतसँग जोडिएको नेपाली सीमाना लक्ष्मीनियासम्म ल्याएका थिए । त्यहाँ अजितमाथि सुजितले गोली प्रहार गरेका थिए । अर्को मोटरसाइकलमा आएका ३ जना युवकले घटनास्थल रेकी गरेका थिए।

अजितको हत्यापश्चात् सुजितले सोनमलाई फोन गरेर काम भएको भन्दै भाग्न आग्रह गरेका थिए । उनी बाराको सिम्रौनगढमा बस्दै आएकी थिइन् । घटनाको कारण प्रेम सम्बन्धमात्र नभई पैसाको लेनदेन पनि रहेको प्रहरीले जनाएको छ ।

त्यस्तै, सुजितको समूहले एक वर्ष अगाडि बारामा पनि एक जनाको हत्या गरेको खुलेको छ । २०७९ पुस ८ मा भारतीय नागरिक ४४ वर्षीय शिवपुजन यादवलाई पनि यही समूहले गढीमाई नगरपालिका २ स्थित भुतही पुलमा हत्या गरेको थियो ।

शिवपुजनसँगै मोटरसाइकलमा आएका सुजितले गोली प्रहार गरी उनको हत्या गरेर फरार भएका थिए । उक्त घटना प्रकरणमा प्रहरीले भारत घोडासहनका प्रमोद रामलाई यसअघि नै पक्राउ गरिसकेको छ ।