गुल्सनबारे कप्तान देवले भने: उसले नेपाललाई विश्वकप र एसिया कपमा पुर्‍याएको बिर्सिनु हुँदैन

काठमाडौं । आईसीसी यू-१९ विश्वकप क्रिकेट खेलेर नेपाली टिम स्वदेश फर्किएको छ ।

आज मध्यान्न स्वदेश फर्किएको नेपाली टिमलाई त्रिभुवन अन्तर्राष्ट्रिय विमानस्थलमा ेल समर्थक र क्यानका पदाधिकारीले स्वागत गरेका थिए ।

स्वदेश फर्किएपछि नेपाली टिमका कप्तान देव खनालले आफूले सोचेजस्तो नभएपनि नेपालका लागि यो ठूलो मौका भएको बताए । उनले प्रतियोगितामा आफू छिट्टै आउट भएकोमा पनि दुख व्यक्त गरे । खनालले भने, ‘मैले सबै म्याचमा राम्रो स्टार्ट पाएँ । तर ठूलो स्कोर बनाउन सकिनँ । हरेक पटक ३०–३५ रनमा आउट भएँ । यसबाट चाहिँ एकदमै निराश छु ।’

प्रतियोगीतामा नेपाली टिमबाट आशा गरिएका गुल्सन झा जस्ता खेलाडीको बलिङ र ब्याटिङ दुवै नचलेको भन्दै भईरहेको आलोचनाबारे खनालले गुल्सन नेपाली टिमको महत्वपूर्ण खेलाडी भएका बताए । उनले गुल्शनको पनि बलिङ राम्रो भएको र ब्याटिङ नचलेपनि उस्लेनै नेपाललाई विश्वकप र एसिया कपमा पुर्याएको कुरा भुल्न नहुने बताए ।

खनालले भने, ‘आकाश, सुभास, अर्जुनले राम्रो गरे । गुल्शनको पनि बलिङ राम्रो भयो । उसको ब्याटिङ अलिकति चलेन । तर, सधैँ चल्छ भन्ने पनि हुँदैन । गुल्शन नेपालको महत्त्वपूर्ण खेलाडी हो । उसले नेपाललाई विश्वकप र एसिया कपमा पुर्‍याएको बिर्सिनु हुँदैन ।’

विश्वकप खेलेर फर्किएका गुल्सन झाले नेपालले विश्वकपमा राम्रो खेलेको बताए । तर, आफ्नो प्रदर्शनबाट भने सन्तुष्ट नरहेको सुनाए । उनले विश्वकपमा ५ खेलमा २५ रन बनाएका थिए । बलिङमा भने उनले औसत प्रदर्शन गरेका थिए ।