नयाँवर्षको पहिलो दिन लुम्बिनीमा घट्यो चहलपहल, कोषको ८ वर्ष यताको तथ्यांक यस्तो छ

काठमाडौं। नयाँ वर्ष २०८१ सालको पहिलो दिन बुद्ध जन्मस्थल लुम्बिनीमा आन्तरिक पर्यटकहरुको चहलपहलमा कमि आएको छ।

२०८१ सालको पहिलो दिन १५ हजार जति पर्यटकहरु लुम्बिनी भ्रमणमा आएको लुम्बिनी विकासका सुचना अधिकृत राजन बस्नेतले जानकारी दिए। गत वर्ष बैशाख १ गते ३८ हजार ५३६ जनाले बुद्ध जन्मस्थल लुम्बिनीको भ्रमण गरेका थिए। यो नयाँ वर्ष २०८१ सालको पहिलो दिनको तुलनामा ६० प्रतिशतले घटेको कोषले जनाएको छ ।

कोभिड अघिका नयाँ वर्षमा लुम्बिनीमा थामी नसक्नुको भिड हुन्थ्यो। २०७६ सालको नयाँ वर्षको दिन मात्र १ लाख ६ हजार ९९५ जनाले लुम्बिनी घुमेका थिए। त्यस अघि २०७५ को पहिलो दिन १ लाख ९ हजार ५२७ जना लुम्बिनी आएका थिए। २०७४ मा ८३ हजार ९५० जना नयाँ वर्ष मनाउन लुम्बिनी आएका थिए। भुकम्प र नाका बन्दीको प्रभावका कारण २०७३ को नयाँ वर्षमा लुम्बिनी घुम्नेहरुमा कमी आएको थियो।

होटल संघ लुम्बिनीका अध्यक्ष गोबिन्द ज्ञवाली भन्छन लुम्बिनीमा आन्तरिक पर्यटकहरुको आगमन कमी हुनुमा बुटवल नारायणगढ सडक विस्तारमा ढिलाई हुनु मुख्य कारण र सडक अस्तव्यस्त हुँदा यात्रा गर्न निकै कठिनाइ छ। जसका कारण भ्रमणमा आउनेहरु नारायणगढ पश्चिम आउन नखोज्ने ज्ञवाली बताउँछन्।

यसैगरी, गत एक हप्ते ध्यान सिविर, लुम्बिनी पिस फेस्टीवल, नेपाल शिक्षक संघको प्रतिनिधिहरुको भेलाले लुम्बिनीमा चहलपहल बढाएको थियो।