पल शाहको ‘मायावी’ फागुन १४ मा रिलिज हुने

काठमाडौं । चलचित्र  ‘मायावी’ फागुन १४ गते रिलिज हुने भएको छ । महाशिवरात्रीको अवसर पारेर ‘मायावी’ फागुन १४ गते रिलिज गरिन लागिएको हो ।

आइतवार राती पोस्टर सार्वजनिक गर्दै निर्माणपक्षले मायबीको रिलिज डेट घोषणा गरेको हो । दीवाकर भट्टराईको निर्देशनमा निर्माण भइरहेको यो चलचित्रले पटकपटक प्रदर्शन मिति परिवर्तन गर्दै आएको थियो ।

सार्वजनिक पोस्टरमा चलचित्रका मुख्य दुई कलाकार पल शाह र दीपिका प्रसाईंलाइ देखाइएको छ । पोस्टरमा पलका दुई र दीपिकाको एउटा तस्बिर देख्न सकिन्छ ।

पोस्टरमा पलको आँखामा आँशु देखिएको छ । उनी दीपिकालाई हेरेर रोहिरहेका छन् भने दीपिकाको अनुहार पनि मलिन छ । उनीहरूको मुहारले सिनेमामा पल र दीपिका प्रेमी–प्रेमिकाको भूमिकामा रहेको र बिछोडको अवस्थामा पुगेको संकेत गरेको देखिन्छ ।

‘मायावी’मा पल र दीपिका सँगै सुशील सिटौला, समिम खान, करिश्मा श्रेष्ठ, प्रशान्त ताम्राकार, लक्ष्मी गिरी, रवि डंगोल, राजाराम पौडेल, अंशु महर्जन, रमा प्रसाईंलगायतको अभिनय छ ।