राष्ट्रिय वाणिज्य बैंक र सिँजा गाउँपालिकाबीच ‘किसान सरल कर्जा’ का लागि सम्झौता

काठमाडौँ । राष्ट्रिय वाणिज्य बैंक लिमिटेड र सिँजा गाउँपालिका, जुम्ला, कर्णालीबीच किसान सरल कर्जा कार्यक्रम सञ्चालन गर्नेसम्बन्धी प्रारम्भिक सम्झौता भएको छ । सम्झौतापत्रमा बैंकका प्रमुख कार्यकारी अधिकृत देवेन्द्ररमण खनाल र सिँजा गाउँपालिकाका अध्यक्ष पूर्णबहादुर धितालले एक कार्यक्रमका बीच सोमबार हस्ताक्षर गरेका छन् ।

सम्झौतापश्चात् कुनै कृषि व्यवसायमा आबद्ध १८ वर्षदेखि ६५ वर्ष उमेरसम्मका नेपाली नागरिक वा कानुनीरूपमा दर्ता भएका कृषि व्यवसायमा संलग्न फर्म वा कम्पनीले गाउँपालिकाको सिफारिससहित कर्जाको लागि आवेदन दिन सक्नेछन् । बैंकले कृषि कर्जा निर्देशिका, २०६९ (संशोधन सहित) अनुसार लगानी गरिने यो कर्जा आवधिक र चालुपुँजी दुवै प्रकृतिको हुनेछ । यो कर्जा ग्रेस अवधिसहित अधिकतम १० वर्ष अवधिका लागि प्रदान गरिने छ । बढीमा १० लाख रूपैयाँसम्म प्रदान गरिने किसान सरल कर्जामा आधार दरमा शून्य दशमलव ५० प्रतिशत प्रिमियम जोडी व्याजदर निर्धारण गरिने छ र गाउँपालिकाले आफ्नो कोषबाट ऋणीलाई एक प्रतिशत व्याज अनुदान दिनेछ । हाल बैंकको आधार दर पाँच दशमलव ४४ प्रतिशत रहेको छ । यो कर्जा लगानीपश्चात् कृषि उपजको व्यावसायिक उत्पादन भई स्वरोजगारमा वृद्धि हुने, आयआर्जन बढ्ने, आयात प्रतिस्थापन हुने तथा गाउँपालिकाको नागरिकको जीवनस्तरमा सकारात्मक परिवर्तन आउने अपेक्षा गरिएको छ । उक्त कार्यक्रममा सिँजा गाउँपालिकाका २ नं वडाका वडाध्यक्ष तीर्थ वर्ड, बैंकका कृषि तथा सामाजिक बैंकिङ विभागका विभागीय प्रमुख अच्युत गौतमलगायत कर्मचारीहरूको उपस्थिति रहेको थियो ।

बैंकको हाल सात वटा प्रदेशअन्तर्गतका ७७ जिल्लाका सबै सदरमुकासहित दुई सय ९४ वटा शाखा कार्यालय, ७२ वटा एक्सटेन्सन काउन्टर, तीन सय १२ वटा एटीएम र ९९ वटा शाखारहित बैंकिङ रहेको छ ।