सवारी चालक अनुमतिपत्र १० वर्षसम्म मान्य हुने

काठमाडौं । अब सवारी चालक अनुमतिपत्र (लाइसेन्स) १० वर्षको अवधिका लागि मान्य हुने भएको छ। सरकारले सवारी तथा यातायात व्यवस्था ऐन, २०४९ संशोधन गर्दै लाइसेन्सको बहाल अवधि दोब्बर बनाउने निर्णय गरेको हो।

नेपाल राजपत्रमा सार्वजनिक गरिएको ऐन संशोधन विधेयकअनुसार अब सवारी चालक अनुमतिपत्र जारी वा नवीकरण गरिएपछि १० वर्षसम्म प्रयोग गर्न मिल्नेछ। यसअघि यो अवधि ५ वर्षको मात्र रहेको थियो। सरकारको यो निर्णयसँगै सेवाग्राहीलाई लाइसेन्स नवीकरणको झन्झटबाट केही हदसम्म राहत मिल्ने अपेक्षा गरिएको छ। साथै, प्रशासनिक प्रक्रिया सरल र प्रभावकारी हुने विश्वास गरिएको छ।