प्रसाईलाई चार दिन हिरासतमा राखेर अनुसन्धान गर्न अनुमति

काठमाडौं । काठमाडौं जिल्ला प्रशासन कार्यालयले राष्ट्र, राष्ट्रियता, धर्म, संस्कृति र नागरिक बचाउ महाभियानका संयोजक दुर्गा प्रसाईलाई चार दिन हिरातमा राखेर अनुसन्धान गर्न अनुमति दिएको छ । सोमबार मध्यराति पक्राउ परेका प्रसाईलाई आज जिल्ला प्रशासन कार्यालयमा उपस्थित गराइएको थियो ।

म्याद थप भएसँग प्रसाई अब कम्तिमा पनि चार दिन प्रहरीको हिरासतमा रहने छन् । आगामी मंसिर ७ गतेदेखि देशभर आन्दोलन चर्काउने चेतावनी दिइरहेका प्रसाईलाई शान्तिविरुद्धको कसुरमा हिजो राति ठिमीस्थित निवासबाटै पक्राउ गरिएको थियो ।

प्रसाईको गिरफ्तारीलाई लिएर राष्ट्रिय मानव अधिकार आयोगले पनि चासो देखाएको छ । आयोगको टोली प्रहरी परिसर काठमाडौं भद्रकाली पुगेर प्रसाईको गिरफ्तारीबारे जानकारी लिएको छ । प्रसाईलाई कानून व्यवसायीसँग परामर्श लिन नदिइएको, अमानवीय तरिकाले गिरफ्तारी गरिएको भन्ने विषयमा आलोचना भइरहेको छ ।