अब बैंक कर्मचारीलाई राहत : अतिरिक्त काम गरे ‘ओटी’, जबरजस्ती ओभरटाइम गराउन नपाइने

काठमाडौं । नेपाल राष्ट्र बैंकले बैंक तथा वित्तीय संस्थाका कर्मचारीलाई अतिरिक्त समयमा काम गर्न बाध्य बनाउन नपाइने व्यवस्था लागू गरेको छ । राष्ट्र बैंकले एकीकृत निर्देशन संशोधन गर्दै कर्मचारीको श्रम अधिकार सुनिश्चित गर्न यस्तो व्यवस्था गरेको हो ।

नयाँ निर्देशनअनुसार कुनै कर्मचारी ओभरटाइम गर्न सहमत भए मात्रै अतिरिक्त समयमा काम लगाउन पाइनेछ । त्यस्तै ओभरटाइम काम गराएबापत सम्बन्धित कर्मचारीलाई थप पारिश्रमिक अनिवार्य रूपमा उपलब्ध गराउनुपर्ने पनि राष्ट्र बैंकले स्पष्ट पारेको छ ।

राष्ट्र बैंकले सबै बैंक तथा वित्तीय संस्थालाई श्रमसम्बन्धी कानुन तथा कर्मचारी व्यवस्थापनसम्बन्धी निर्देशन पूर्ण रूपमा पालना गर्न समेत निर्देशन दिएको छ । यस व्यवस्थाले बैंकिङ क्षेत्रमा कर्मचारीमाथि हुने अतिरिक्त कार्यभार नियन्त्रण गर्न र श्रम अधिकार संरक्षणमा सहयोग पुग्ने अपेक्षा गरिएको छ ।