स्पानिस ला लिगामा बार्सिलोना बराबरीमै रोकियो, ६ अंकले रियलको अग्रता

काठमाडौं, १३ मंसिर । स्पेनिस ला लिगा फुटबलमा बार्सिलाना रियल सोसिडाडसँग बराबरीमा रोकिएको छ । र, इएल क्लासिको अघिसम्म लिग लिडर रियल मड्रिड भन्दा ६ अंकले पछाडि रह्यो ।

आइतबार राति भएको खेलमा बार्सिलोनाले रियल सोसिडाडसँग १-१ को बराबरी खेल्दै अंक बाँडेको हो । घरेलु मैदान एनोएटा स्टेडियममा भएको खेलमा सोसिडाडले ५३ औं मिनेटमा डा सिल्भाको गोलबाट अग्रता लिएको थियो । ६ मिनेटपछि नै लिओनल मेस्सीले बराबरी गोल फर्काए ।

तर, थप गोल गर्न बार्सिलोना असफल भएको छ । एनोइटा त्यो रंगशाला हो, जहाँ बार्सिलोनाले पछिल्लो ८ खेलमा जित हात पार्न सकेको छैन । बार्सिलोना १३ खेलबाट २७ अंकसहित दोस्रो स्थानमा छ । रियलको ३३ अंक छ भने तेस्रो स्थानमा रहेको सभिल्लाको २७ अंक नै छ ।