प्लास्टिक पेलेर पोखरामा सडक पिच

पोखरा,

सहरमा जता ततै प्लास्टिक छन् । महानगरलाई फोहोर व्यस्थापन गर्न हम्मे हम्मे छ । तर तिनै फालिएका प्लास्टिकबाट पक्की सडक बनाउन सकिन्छ भने नमुना पोखरामा प्रस्तुत भएको छ । पोखराका दुई युवाले भुटानबाट यस्तो सिप सिकेर पोखरामा १ सय मिटर पिच गरेका देखाउका छन् ।

पोखरा १४ को अनुपम टोलको सडकलाई युवाले प्लास्टिक प्रयोग गरेर सडक पिच गरेका हुन् । ग्रिन रोड वेस्ट म्यानेजमेन्ट कम्पनीका युवाले प्लास्टिक पेलेर बाटो पिच गर्ने प्रविधि भुटानमा सिकेर पोखरामा प्रयोग गरेका हुन् । कम्पनीले मेकानिकल इन्जिनियर विमल बास्तोला र सिभिल इन्जिनियर राजीव सुवेदीलाई प्लास्टिकको प्रयोगबाट सडक पिच गर्ने प्रविधिको एक हप्ते तालिम लिन भुटान पठाएको थियो ।

भुटानबाट फर्केपछि उनीहरुले सडक पिच गरेका हुन् । एक सय मिटर सडक पिच गर्न ३ सय केजी प्लास्टिक लागेको कम्पनीका मेकानिकल इन्जिनियर विमल बास्तोलाले जानकारी दिए । यो प्राविधिअनुसार २ हजार ४ सय ७५ केजी अलकत्र खपत भएको र त्यसमा प्लास्टिकको मात्रा १० देखि १५ प्रतिशतसम्म प्रयोग भएको उनले बताए ।

पिच गर्नका प्लास्टिकलाई ससाना टुक्रा पारेर धोएपछि मात्र प्रयोग गरिने बास्तोलाले बताए । प्लास्टिकका बोत्तल, ठूला पाइपबाहेक गुड्कादेखि चाउचाउका खोलसम्म यो प्रविधिअनुसार सडक पिच गर्न प्रयाग गर्न सकिने कम्पनीको भनाई छ । प्लास्टिकले वातावरणमा पार्ने प्रभावलाई कम गर्न र यसको वैकल्पिक प्रयोग गर्न पनि पिच निर्माणमा प्रयोग गरेको उनले बताए ।

प्लास्टिकको प्रयोग गरेर बनाइने यस किसिमको सडकको सुरुवात सन् २००१ मा भारत सुरु भएको थियो । फोहोरका रुपमा फालिने प्लास्टिकको प्रयोगले बाटो पिच गर्ने प्राविधिअनुसार सस्तो, बलियो र टिकाउ हुने कम्पनीका दाबी छ । सडक बनाउन सबै प्रविधि बाहिरबाट ल्याएर पिच गर्दा पनि २० हजार रुपैयाँ कम परेको कम्पनीका सञ्चालक सजिब बास्तोलाले जानकारी दिए । उनले पोखरा महानगरपालिकाले उपकरण नै खरिद गरेर प्लास्टिकबाट सडक पिच गर्ने योजना ल्याए अहिलेको प्राविधिभन्दा धेरै सस्तो हुने बताए ।

बिटुमिन, प्लास्टिक, बालुवा, चिप्सलाई मिसाई पकाइए यो प्रविधि अनुसार सडक पिच गरिने कम्पनीले जनाएको छ । एक किलोमिटर सडक निर्माण गर्दा १ टर्न प्लास्टिकको प्रयोग हुने र १ टन अत्रकत्रको बचत हुने उनीहरुको भनाइ छ ।

प्लास्टिकको प्रयोगबाट सडक पिच गर्ने प्रविधिले बिनामूल्य फालिने फोहोर प्लास्टिकले मूल्य पाउने, ल्यान्ड फिल साइडको आयु बढ्ने, अरु प्रविधिभन्दा सडक बलियो हुने बास्तोलाले बताए । भारत, भुटान, अस्ट्रेलिया लगायतका देशमा यो प्रविधिबाट धमाधम सडक पिच भइरहेको कम्पनीको भनाइ छ । पोखराका विभिन्न ठाउँबाट २० टनको हाराहारिमा प्लास्टिक ल्यान्डफिलमा पुग्ने गर्छ ।

ganthan.com बाट