सुनको मूल्यमा नयाँ रेकर्ड, अहिलेसम्मकै महँगो

काठमाडौं । सुनको भाउ फेरि आकासिएको छ । सुनचाँदी व्यावसायी महासंघका अनुसार बुधबारका लागि नेपाली बजारमा प्रति तोला छापावाला सुनको मूल्य ७६ हजार ५ सय पुगेको छ । यो बुधबारको तुलनामा हजार रुपैयाँ बढेको हो । मंगलबार नेपाली बजारमा प्रतितोला सुनको मूल्य ७५ हजार ५ सयमा कारोबार भएको थियो । सुनले नेपाली बजारमा भने गत शुक्रबार देखि नयाँ किर्तिमान कायम गर्दै आइरहेको छ ।

शुक्रबार त्यस अघिको सबै रेकर्ड तोड्दै ७४ हजार ५ सय पुगेको सुन आइतबार पुन हजार रुपैयाँ बढेको थियो । यस्तै सोमबार पनि सुन ५ सय बढेर ७६ हजार पुगेपनि मंगलबार भने ५ सय घटेको थियो । तर बुधबार फेरि हजार रुपैयाँ बढेको हो । यस्तै, तेजावी सुनको मूल्य पनि प्रतितोला ७६ हजार २ सय रुपैयाँ पुगेको छ । अमेरिका र ईरानको बीचमा बढेको तनावको असर सुनमा देखिएको विश्लेषकहरुले बताएका छन् ।

अहिले अन्तर्राष्टिय बजारमै सुनको मूल्य बढेको छ । केही दिन अघि प्रतिऔंस १५ सय ३० अमेरिकी डलर रहेको सुनको भाउ सोमबार १५ सय ७७ प्रतिऔंस पुगेको थियो । मंगलबार त्यो घटेर १५ सय ६५ मा पुगेपनि बुधबार फेरि बढेर १६ सय पुगेको छ । अन्तर्राष्ट्रिय मिडियाहरुले पनि सुनको मूल्य अझै बढ्ने बताइरहेका छन् । नेपाली सुनचाँदी व्यावासायी पनि सुनको मूल्य अझै बढ्न सक्ने आकलन गरिरहेको छन् ।

सुनसँगै चाँदीको मूल्य पनि आकासिएको छ । आइतबार ९ सय रुपैयाँ प्रतितोलामा कारोबार भएको चाँदी सोमबार २० रुपैयाँ बढेर ९ सय २० रुपैयाँ पुगेको थियो । मंगलबार २० रुपैयाँ घटेर पुन ९ सय पुगेको चाँदी बुधबार फेरि २० रुपैयाँ बढेको सुनचादी व्यावसायी महासंघले जनाएको छ ।