‘हिजो राति अमेरिकाको गालामा थप्पड हान्यौं’

एजेन्सी । इरानका सर्वोच्च नेता आयातोल्लाह अलि खामेनीले मिसाइल आक्रमण गरेर अमेरिकाको गालामा थप्पड हानेको बताएका छन् । स्थानीय समयअनुसार बुधबार बिहान देशका नाममा सम्बोधन गर्दै खामेनीले मंगलबार मध्यरातमा इराकस्थित दुई अमेरिकी सैन्य अखडामा दर्जन बढी मिसाइलबाट हमला गरिएको बताए ।

‘हिजो राति मिसाइल आक्रमण गरेर हामीले उनीहरूको गालामा थप्पड हान्यौं । तर सैन्य कारबाही मात्रले पुग्दैन,’ खामेनीले भने । उनले मध्यपूर्वमा भ्रष्ट अमेरिकाको उपस्थिति अन्त्य हुनु पर्ने बताए । ‘अमेरिका यहाँ आएर युद्ध, विभाजन र ध्वंशलाई बढावा दिइरहेको छ,’ उनले भने ।

खामेनी गत शुक्रबार बग्दाद विमानस्थल नजिकै अमेरिकी ड्रोन आक्रमणमा मारिएका सैनिक कमाण्डर कासिम सुलेमानीको प्रशंसा पनि गरे । ‘सुलेमानी महान् र बहादुर लडाकु थिए । र उनी हाम्रा परम मित्र थिए,’ खामेनीले भने । इरानले हानेका १५ मिसाइलले अमेरिकी सैन्य अड्डामा कति क्षति भयो भन्ने स्वतन्त्र पुष्टी हुन सकेको छैन ।

इरानी सरकारी सञ्चारमाध्यमले सैनिक स्रोतलाई उद्धृत गर्दै आक्रमणमा ८० अमेरिकी सैनिक मारिएको दाबी गरेका छन् । तर अमेरिकी राष्ट्रपति डोनाल्ड ट्रम्पले भने अहिलेसम्म कुनै क्षति नभएको बताएका छन् ।