भारत संग फाइनलमा भिड्दै नेपाल – जानकारी केन्द्र

नेपाली राष्ट्रिय फुटबल टोलीका लागि भारत परम्परागत प्रतिद्वन्द्वी हो । दक्षिण एसियाली प्रतियोगितामा भारत सधैँ नेपालको बाधक बन्दै आएको छ । नेपाली सिनियर फुटबल टोलीले भारतसँग १६ अन्तर्राष्ट्रिय खेल खेल्दा दुईमा मात्रै जित हात पारेको छ ।

उमेर समूहअन्तर्गत यू–१६ मा हालसम्म भएको तीन खेलमध्ये तीनैमा नेपाल पराजित भएको छ । यस्तै सिनियर महिला टोलीले पनि दक्षिण एसियाली फुटबलको तीन फाइनलमा नतिजा भारतीय टोलीलाई नै सुम्पिएको छ । यो पृष्ठभूमिमा नेपाल अर्काे उपाधिका लागि फेरि भारतविरुद्ध मैदानमा उत्रँदै छ । नेपाल शनिबार सातदोबाटोस्थित अखिल नेपाल फुटबल संघ (एन्फा) एकेडेमीको मैदानमा हुने पहिलो दक्षिण एसियाली फुटबल महासंघ (साफ) यू–१९ च्याम्पियनसिपको उपाधिका लागि भारतविरुद्ध उत्रँदै छ ।

पहिलोपटक आयोजित प्रतियोगिताको उपाधि उचाल्ने योजनामा रहेको नेपाली टोलीलाई फेरि एकपटक भारतको चुनौती पन्छाउनुपर्नेछ । यद्यपि नेपालका लागि भारतलाई पराजित गनु सहज पक्कै हुनेछैन । नेपाल र भारत जारी प्रतियोगिताको अपराजित टोली हुन् । नेपाल समूह ए तथा भारत समूह बीको विजेता बन्दै सेमिफाइनलमा पुगेका थिए । सेमिफाइनलमा तुलनात्मक रूपमा नेपालले राम्रो नतिजा आत्मसात् गर्‍यो । नेपालले समूह बीको उपविजेता अफगानिस्तानलाई ३–२ ले पराजित गर्दा भारतले भने समूह एको उपविजेता बंगलादेशलाई सडनडेथमा पराजित गर्‍यो ।

यद्यपि फाइनलमा नेपाली टोली भारतविरुद्ध सजग रहनुपर्नेछ । भारत आफ्नो दोस्रो टोली लिएर प्रतियोगिताका लागि नेपाल आएको हो । भारतको पहिलो टोली मलेसियामा अर्काे प्रतियोगिता खेल्दै छ । दोस्रो टोली भए पनि भारतले जारी प्रतियोगितामा आफूलाई उत्कृष्ट रहेको प्रमाणित गरिसकेको छ । भारत प्रतियोगितामा अपराजित मात्रै होइन ९० मिनेटको निर्धारित समयमा कुनै गोल नबेहोर्ने टोली पनि हो । भारतले समूह चरणको दुई तथा सेमिफाइनलको एक खेलमा कुनै पनि गोल बेहोरेको छैन । यस अर्थमा भारतीय टोलीको रक्षापंक्तिलाई बलियो मान्न सकिन्छ । भारतको तुलनामा नेपाली टोलीको रक्षापंक्ति भने कमजोर छ । नेपालले जारी प्रतियोगिताको प्रत्येक खेलमा गोल बेहोरेको छ ।