जम्बो मोटर्सले ई–स्कुटर नेपाल भित्र्याउँदै, यस्ता छन् विशेषता..

काठमाडौं । जम्बो मोटर्सले एकपटकको फुल चार्जमा २४० किलोमिटर यात्रा गर्न सक्ने ई–स्कुटर नेपाल भित्र्याउने जनाएको छ । जुन करिब काठमाडौंदेखि पोखरासम्मको दुरी हो ।

जम्बो मोटर्सले भारतमा निर्मित उक्त ई-स्कुटर नेपालमा आगामी साउन महिनाभित्र सार्वजनिक हुने जानकारी दिएको छ । कम्पनीले बढ्दो पेट्रोलको मूल्यलाई प्रतिस्थापन गर्न उक्त विद्युतीय स्कुटर भित्राउने जनाएको छ ।

यस ई–स्कुटर घरमै भएको प्लगबाट चार्ज गर्दा २ घन्टामै फुलचार्ज हुने भनिएको छ । त्यस्तै, यसमा फास्ट चार्जर पनि उपलब्ध गराइनेछ । फास्ट चार्जरबाट चार्ज गर्दा केबल ३० मिनेटमै फुचालर्ज हुने कम्पनीको दावी छ ।

रेट्रो डिजाइनको यो स्कुटरमा ब्याट्रीलाई फुलचार्जमा भेरियन्टअनुसार १२० किलोमिटरदेखि २४० किलोमिटरसम्म चलाउन सकिनेछ । ब्राभोमा ३ किलोवाटको मोटर जडान गरिएको छ ।

साथै, २० र ४० एम्पियरको ब्याट्री ७२ भोल्टको हुनेछ । स्कुटरमा टीएफटी डिस्प्ले, की लेस स्टार्ट, बाइडर टायर, टेलीस्कोपिक सस्पेन्सन, एलईडी लाइट्स, डिस्क ब्रेक, बुट स्पेसजस्ता सुविधा छन् । जम्बो मोटर्सले नेपालमा ओपाई र लेभ्निङ ब्रान्डका विद्युतीय स्कुटर बिक्री गर्दै आएको छ ।

यसैगरी, स्कुटरको मूल्य भने निर्धारण गरिएको छैन । यद्यपी, कम्पनीले ३ लाख रुपैयाँ आसपास पर्न सक्ने जनाएको छ ।