बाल अस्पतालको बस दुर्घटनामा एकको मृत्यु, ४३ घाइते

काठमाडौं । काभ्रेको बनेपामा बस सडकबाट खस्दा एक जनाको मृत्यु भएको छ भने ४३ जना घाइते भएका छन् ।

बनेपा १० स्थित अपांग बाल अस्पताल तथा पुनर्स्थापना केन्द्रका कर्मचारी बोकेको बा १ ज ५७४७ नम्बरको बस सडकको डिलबाट खस्दा दुर्घटना भएको हो । दुर्घटनामा ५२ वर्षीय लेख कुमारी बस्नेतको उपचारको क्रममा मृत्यु भएको जिल्ला प्रहरी कार्यालय काभ्रेले जनाएको छ ।

त्यस्तै, घाइतेहरुको जिल्लाका विभिन्न अस्पतालमा उपचार भइरहेको जनाइएको छ । जिल्ला प्रहरी कार्यालयका प्रमुख एसपी चक्रराज जोशीका अनुसार कर्मचारी बोकेर निस्केको अस्पतालको बस मोटरसाइकललाई साइड दिने क्रममा भासिएर पल्टिएको हो ।