गंगालालमा अत्यावश्यक सामान नभएपछि मुटुको शल्यक्रिया रोकियो

काठमाडौं । शहीद गंगालाल राष्ट्रिय हदृयरोग केन्द्रमा अक्सिजेनेटर अभाव भएपछि मुटुका शल्यक्रिया रोकिएको अस्पताल प्रशासनले जनाएको छ ।

अस्पतालको शल्यक्रिया सेवा बन्द भएपछि भर्ना भएका करिब ४५ जना बिरामी यसै फर्किएका छन् । नेपालमा अन्य अस्पतालमा पनि शल्यक्रिया सेवा बन्द भएको खबर निर्देशक डा. चन्द्रमणि अधिकारीले अनलाइखबरलाई दिएका छन् । उनले भने, नेपाल तथा भारतमा पनि अक्सिजेनेटरको सर्टेज छ ।

मुटुको शल्यक्रियाको क्रममा अक्सिजेनेटर मेसिनले रगतमा भएको कार्बनडाइअक्साइड हटाएर अक्सिजन हाल्ने काम गर्छ । यस क्रममा उपकरणको सहयोगमा मुटु र फोक्सोको काम कृत्रिम रुपमा सञ्चालन गरिनुपर्छ ।

अस्पतालमा गत असार १९५ वटा मुटुको शल्यक्रिया भएको थियो । बच्चाको लागि प्रयोग हुने अक्सिजेनेटर भने १५० वटा मौज्दात छ । अक्सिजेनेटर ओपन हार्ट सर्जरीमा प्रयोग हुन्छ । बच्चाका लागि प्रयोग गरिने अक्सिजेनेटर भए तापनि युवाका लागि प्रयोग हुने अक्सिजेनेटर नभएपछि सेवा बन्द गर्नुपरेको डा. अधिकारीले बताए ।

चिकित्सकका अनुसार अक्सिजेनेटर उपकरण एक बिरामीमा एक पटक मात्र प्रयोग गरिन्छ । यो उपकरणको मूल्य ५० हजारसम्म पर्छ ।

डा. अधिकारीले भने, ‘हामीले चैतमा नै अर्डर गरिसकेका थियौं । तर, ग्बोल सर्टेजको कारण यो अवस्था आयो । मेरो स्तरबाट ल्याउन सकिन । स्वास्थ्य मन्त्रालय तथा नेपालमा नाम चलेको अन्य डाक्टरले कदम चाल्दा चाडैं ल्याउन सकिन्थो होला नि ! ल्याउन सकिने अवस्था छैन । त्यो कुरा सबैले बुझ्नुपर्‍यो ।’