सिक्लेस हाइड्रोपावरले आयोजना प्रभावित क्षेत्रमा खुलायो आइपीओ

काठमाडौं । सिक्लेस हाइड्रोपावर लिमिटेडले आजबाट आयोजना प्रभावित क्षेत्रका बासिन्दाका लागि आईपीओ बिक्री खुलाएको छ । सेयर निष्कासन तथा बिक्री प्रबन्धकमा बीओके क्यापिटल मार्केट लिमिटेड रहेको छ ।

उक्त कम्पनीले कास्कीको मादी गाउँपालिका- १, २ र ३ नम्बर वडाका बासिन्दाका लागि आइपीओ निष्कासन तथा बिक्री खुला गरेको हो । जहाँ स्थानीयका लागि जारी पुँजी ८५ करोडको १० प्रतिशत अर्थात ८ करोड ५० लाख रुपैयाँको ८ लाख ५० हजार कित्ता आईपीओ जारी गरेको छ । स्थानीयले न्युनतम १० र अधिकतम १ लाख कित्ताका लागि छिटोमा साउन २० र ढिलोमा भदौ ५ गतेसम्म दरखास्त दिन सक्नेछन् ।

लगानीकर्ताले माच्छापुच्छ्रे बैंक मादी गापा-१ को कार्यालय, पोखराका मुक्तिनाथ विकास बैंक काहुँखोला, बैंक अफ काठमान्डू न्यूरोड र पोखरा फाइनान्स लगायतबाट आवेदन दिन सक्छन् । १३ मेगावटको यो आयोजनाको कुल लागत २ अर्ब ३१ करोड ७६ लाख ५५ हजार छ भने प्रति मेगावट उत्पादन लागत लगभग १७ करोड ८२ लाख ८१ हजार रुपैयाँ छ ।

यसगरी, स्थानीय बासिन्दाका लागि हाइड्रोपावरले बिक्री गरेको सेयरहरु सर्वसाधरणलाई निष्कासन गरेर सेयर बाँडफाँट भएको मितिले ३ वर्ष पुरा नभएसम्म बिक्री वितरण वा हस्तानतरण गर्न पाइने छैन ।