नाडा अटो एक्सपो २०२२ स्थगित, यस्तो छ कारण..

काठमाडौं । आयोजक नाडा अटोमोबाइल्स एसोसिएशनले ‘नाडा अटो एक्सपो २०२२’ स्थगित भएको जनाएको छ ।

नाडाले यही भदौ ७ गते देखि १२ गतेसम्म काठमाण्डौको भृकुटी मण्डपमा एक्सपो गर्ने मिति तय गरेको थियो । नाडाले सोही एक्सपो हाल स्थगित गर्ने निर्णय गरेको छ । सरकारले सवारी साधनको आयात प्रतिबन्ध लगाएपछि यसपटकको एक्सपो नहुने भएको हो ।

सरकारले गत आर्थिक वर्षमा कार, जीप र भ्यानको आयातमा लगाएको प्रतिबन्ध चालू आर्थिक वर्षदेखि खुल्ने भनेको थियो । तर, सरकारले सवारी साधनको आयात झन लम्ब्याउँदै भदौ १४ गतेसम्म पुर्याएपछि एक्सपो स्थगित भएको हो । यस्तै, सरकारले १५० सीसीभन्दा माथिका दुई पाँगे्र सवारी साधनहरुको आयातमा समेत थप प्रतिवन्ध लगाएको छ । जसकारण नाडा एक्सपोको आयोजना रद्ध गर्नुपरेको नाडाले जानकारी दिएको छ ।