अनेरास्ववियुद्वारा त्रिवि सेवा आयोगको ताला खोल्न माग गर्दै प्रदर्शन

काठमाडौं । त्रिभुवन विश्वविद्यालयको सेवा आयोगको कार्यालयबाहिर नेकपा एमालेको विद्यार्थी संगठन अनेरास्ववियुले प्राध्यापक र सहप्राध्यापकको अन्तर्वार्ता सञ्चालनको माग गर्दै प्रदर्शन गरेको छ ।

आइतबार अनेरास्ववियूले सेवा आयोगको समस्या वार्ता गरी समाधान गर्न र तत्काल ताला खोल्न माग गर्दै प्रदर्शन गरेको हो । नेपाली कांग्रेसका विद्यार्थी संगठन नेपाल विद्यार्थी संघले गरेको तालाबन्दीका कारण सेवा आयोगको काम हाल बन्द छ । अनेरास्ववियुका केन्द्रीय कमिटी सचिवालय सदस्य तथा त्रिवि इन्चार्ज मदन विष्टले सेवा आयोगमा ताला लाग्दा प्राध्यापक र सहप्राध्यापकको पूर्वनिर्धारित परीक्षा सञ्चालनको माग गर्दै प्रदर्शन गरेको बताए ।

यसैगरी, सेवा आयोगले त्रिविलाई एमालेको भर्ती केन्द्र बनाउन खोजेको आरोप लगाउँदै पूर्वनिर्धारित परीक्षा स्थगित नगरेसम्म आयोगका अध्यक्ष लालुप्रसाद पौडेललाई कार्यालय प्रवेश गर्न नदिने भन्दै नेविसंघले साउन १३ गते तालाबन्दी गरेको थियो ।