धूम्रपानको लत छाड्ने सजिलो उपायहरु यस्ता छन्..

हामी सबैलाई धूम्रपानको खतरा बारे थाहा छ । चुरोटमा निकोटिन भएको कारण योे लत क्यान्सर र मुटु रोगको प्रमुख कारण बन्ने गर्छ । तर, एक पटक बानी लागीसके पछि धूम्रपान गर्ने व्यक्तिलाई यो लत त्याग्न अति मुस्किल पर्छ । तर, हामी यो लेखमा धूम्रपानको लत छाड्ने सजिलो उपायहरु लिएर आएका छौँ ।

केही भोजनले चुरोटको तलतल लाग्न दिँदैन र बिस्तारै धूम्रपानको लत छुट्ने गरेको बताइन्छ । जसका लागि तलका खानेकुरा खाँदा चुरोट छाड्न मद्दत पुग्न सक्छः

– धूम्रपान त्याग्न सुन्तला खानु लाभदायक हुन्छ । सुन्तलाको जुस पनि त्यत्तिकै प्रभावकारी हुन्छ । यसमा भएको भिटामिन सिले चुरोटका कारण पुगेको क्षतिलाई पनि न्यूनीकरण गर्छ ।

– नुनिलो खानेकुरा खाँदा पनि चुरोट पिउन मन लाग्दैन । चुरोट तान्न मन लागेको बेलामा नुनिलो खानेकुरा खानु लाभदायक हुन्छ ।

– गोलभेँडाको सुगन्धले चुरोटको गन्धलाई घटाउँछ । यसको जुस पिउँदा चुरोट पिउँदा जत्तिकै मजा आउँछ साथै हानि पनि हुँदैन ।

– चुरोट तान्दा पाउने सन्तुष्टि काजु बदाम चपाउँदा पनि मिल्दछ ।

– तरकारीमा गाजर, ब्रोकाउली, काँक्रो र ज्वानो जस्ता कुरा चपाएर खाँदा चुरोटको तलतलबाट छुटकारा मिल्छ । नियमित यी कुरा खाँदा चुरोट बेस्वाद लाग्न थाल्छ ।

– दूधले स्वास्थ्यलाई लाभ त पुराउँछ नै यस अलावा नियमित एक गिलास दूध पिउँदा धूम्रपान गर्न मन लाग्दैन ।

– चुरोटको तलतल छाड्न अदुवा सबैभन्दा प्रभावकारी मानिन्छ । एक टुक्रा अदुवालाई पिसेर एक चम्चा चिनीमा मिसाएर नियमित खाँदा धूम्रपानको लत छुट्दै जान्छ ।

– धूम्रपान गर्नेले एक्कासि चुरोट खान छाड्दा रगतमा चिनीको मात्रा घट्छ जसका कारण टाउको दुख्छ, चक्कर आउँछ । यस्तो बेलामा जौ खाँदा निकोटिन तिर फर्किन मन लाग्दैन ।