भक्तपुरमा कार, मोटरसाइकल र बस दुर्घटनामा घाइते भएका बालकको मृत्यु

काठमाडौँ । भक्तपुरमा तीन वटा सवारीसाधन दुर्घटना हुँदा ६ वर्षीय बालकको मृत्यु भएको छ। शनिबार दिउँसो सवा ३ बजे सूर्यविनायक नगरपालिका-५ सृजनानगरमा दुर्घटना भएको हो। जिल्ला प्रहरी परिसर भक्तपुरका डिएसपी राजु पाण्डेका अनुसार कार, मोटरसाइकल र बस दुर्घटनामा परेका हुन्।

जगातीबाट काठमाडौं आउँदै गरेको बा ६ च ८८५८ नम्बरको कार, बा ५५ प ९९२२ नम्बरको मोटरसाइकल र बा ४ ख ५७९६ नम्बरको बस दुर्घटनामा परेको हो। दुर्घटनामा परी मोटरसाइकलमा सवार ६ वर्षीय बालकको मृत्यु भएको डिएसपी पाण्डेले बताए। मोटरसाइकल चालक दोलखा घर भई काठमाडौंको बौद्ध बस्ने ४९ वर्षीय ढावा शेर्पा घाइते छन्। उनका ६ वर्षीय छोरा आर्जनको उपचारको क्रममा मृत्यु भएको हो।

उनको आइतबार बिहान नर्भिक अस्पताल काठमाडौंमा मृत्यु भएको डिएसपी पाण्डेले बताए। ढावाको भने मध्यपुर ठिमीमा उपचार भइरहेको छ। प्रहरीको प्रारम्भिक अनुसन्धानबाट दुर्घटना हुनुअघि एक जनाले बाटो काटेको देखिएको छ। जसले गर्दा कारले ब्रेक लगाएको थियो। ब्रेक लगाउँदा पछाडिबाट आउँदै गरेको मोटरसाइकल कारमा ठोक्किएर लडेपछि एकै दिशामा गुडिरहेको बसले उनीहरूलाई किचेको हो।

मोटरसाइकलमा मृतककी आमा पनि सवार थिइन्। तर उनलाई भने केही नभएको प्रहरीले जनाएको छ।प्रहरीले अनुसन्धानको लागि बसका चालक दोलखाका २६ वर्षीय भरत चौलागाईं र कार चालक भक्तपुरकी २६ वर्षीया रिया कायस्थलाई पक्राउ गरेको छ। यस घटनाको अनुसन्धान प्रहरी वृत्त जगातीले गरिरहेको परिसरले जनाएको छ।