प्रधानमन्त्री प्रचण्डले विश्वासको मत नपाए के हुन्छ ?

काठमाडौं । प्रधानमन्त्री पुष्पकमल दाहाल ‘प्रचण्ड’ले आज विश्वासको मत लिंदैछन् । नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, जनमत पार्टी, नागरिक उन्मुक्ति पार्टी र केही स्वतन्त्र सांसदको समर्थनमा यही पुस १० प्रधानमन्त्री नियुक्त भएका प्रचण्डले एक महिना अगावै विश्वासको मत लिन लागेका हुन् ।

मिलिजुली सरकारका प्रधानमन्त्रीले प्रतिनिधिसभाको विश्वास लिनुपर्ने संवैधानिक प्रावधान अनुसार प्रचण्डले विश्वासको मत लिन लागेका हुन् । २७५ सदस्यीय प्रतिनिधिसभाको विश्वास लिन प्रधानमन्त्रीले १३८ सांसदको समर्थन लिनुपर्छ ।

प्रधानमन्त्री बन्न समर्थन नगरेका र सरकारमा सहभागी नभएका अन्य दलहरूले समेत प्रचण्डलाई विश्वासको मत दिन आश्वासन दिएका छन् । विश्वासको मतका लागि सबै तयारी पूरा भइसकेको छ । प्रतिनिधि सभाको बैठक सोमबारदेखि नै सुरु भएको हो । ज्येष्ठ सदस्यको हैसियतले राप्रपाका पशुपतिशम्शेर जबराले बैठक सञ्चालन गरिरहेका छन् ।

विश्वासको मत पाउन नसके के हुन्छ रु
प्रधानमन्त्री प्रचण्डले विश्वासको मत प्राप्त गर्न नसके संविधानको धारा ७६ को उपधारा ३ बमोजिम सरकार निर्माणको अर्को चरण सुरु हुन्छ । यस प्रावधान बमोजिम प्रतिनिधिसभामा प्रतिनिधित्व गर्ने दलहरूमध्ये सबैभन्दा ठूलो दलको संसदीय दलको नेतालाई राष्ट्रपतिले प्रधानमन्त्रीमा नियुक्त गर्नुहुन्छ ।

अहिले कांग्रेस प्रतिनिधिसभामा सबैभन्दा ठूलो दल रहेको छ । प्रचण्डले प्रधानमन्त्रीमा प्रतिनिधिसभाका बहुमत सांसदले विश्वासको मत नदिएमा कांग्रेस पार्टीबाट शेरबहादुर देउवालाई राष्ट्रपतिले प्रधानमन्त्रीमा नियुक्त गर्नुपर्ने हुन्छ । त्यसरी नियुक्त हुनुभएका प्रधानमन्त्रीले पनि संसद्मा नियुक्त भएको ३० दिनभित्रमा विश्वासको मत लिनुपर्ने हुन्छ ।

यद्यपि प्रधानमन्त्रीलाई विश्वासको मत पाउनका लागि सुविधाजनक बहुमत रहेको छ । कांग्रेस र नेकपा एकीकृत समाजवादीले विपक्षमा मतदान गर्दा पनि प्रचण्डलाई पर्याप्त सांसदको साथ रहेको छ ।