नक्कली भुटानी शरणार्थी प्रकरणमा पूर्वाग्रह र दवाबविना निष्पक्ष छानविन गर्न एमालेको आग्रह

काठमाडौं ।  नेकपा (एमाले) ले नक्कली भुटानी शरणार्थी प्रकरणमा कुनै राजनीतिक पूर्वाग्रह र दवावबिना निष्पक्ष रुपमा छानबिनको माग गरेको छ । गत वैशाख २७ गतेदेखि आजसम्म (३० गतेसम्म) बसेको पार्टीको केन्द्रीय समिति बैठकले नक्कली भुटानी शरनार्थी प्रकरणमा छानविन गरी दोषीमाथि हदैसम्मको सजाय माग गर्ने प्रस्ताव पारित गरेको हो ।

विगत लामो समयदेखि भित्र–भित्रै चलिरहेको नेपाली नागरिकलाई नक्कली भुटानी शरणार्थी बनाएर विदेश पठाउने घृणित ठगी–धन्दा सतहमा आएको एमालेको निष्कर्ष रहेको छ । उक्त घटनामा गृह मन्त्रालयकै उच्च नेतृत्व संलग्न रहनुले राज्यविरुद्धको अपराध सङ्गठित रुपमा भइरहेको प्रष्ट भएको एमालेको बुझाई रहेको छ ।

उक्त प्रकरणले अन्तर्राष्ट्रिय क्षेत्रमा मुलुकको प्रतिष्ठामाथि नै गम्भीर प्रश्न खडा भएको एमालेको बुझाई रहेको छ ।
‘यो बैठक उक्त प्रकरणको कुनै राजनीतिक पूर्वाग्रह र दवावबिना निष्पक्ष रुपमा छानबिन गरी दोषीमाथि हदैसम्मको सजाय होस् भन्ने माग गर्दछ,’– प्रस्तावमा भनिएको छ ।

साथै, हिरासतमा राखिएका व्यक्तिहरुलाई छानबिनको दायरामा आउनसक्ने व्यक्तिसँग अवैध रुपमा भेटघाट गराउने, पैसा दिएर मुद्दा मिलाउने प्रयास गर्ने, असम्बद्ध व्यक्तिहरुको नाम लिन र आफू अनुकूलको बयान गराउन दवाब दिने जस्ता क्रियाकलाप नियन्त्रण गर्नसमेत एमालेले माग गरेको छ ।

दोषी कोही नछुटून् र निर्दोष कोही नफसून् भन्ने कुरातर्फ एमालेले सरकारको गम्भीरतापूर्वक ध्यानाकर्षण गराएको छ । राज्यबाट गरिने निष्पक्ष अनुसन्धानमा एमालले पूर्ण सहयोग गर्नेसमेत बताइएको छ ।