आजदेखि सार्वजनिक यातायातको भाडा घट्यो !

काठमाडौं । बागमती प्रदेशले बिहिबारदेखि सार्वजनिक यातायातको भाडा घटाउने भएको छ । नेपाल आयल निगमले इन्धनको मूल्यमा स्वचालित प्रणाली लागू गरेसँगै बागमती प्रदेशले गाडी भाडा समायोजन गर्न लागेको हो ।

बागमती प्रदेशमा चल्ने लामो रुटको सवारीमा २ दशमलव ३० प्रतिशत, मालबाहक सवारी साधन (ट्रक) मा ३ दशमलव १ प्रतिशत र सिटी बसहरुमा ३ दशमलव २६ प्रतिशतले भाडा घट्ने मन्त्रालयले जनाएको छ ।

नयाँ भाडा दर अनुसार यसअघि २ सय ९४ रुपैयाँ कायम रहेको काठमाडौं–कुरिनटारसम्मको भाडा २ सय ८७ रुपैयाँ कायम हुनेछ । यस्तै अन्य रुटहरुमा पनि भाडा घट्ने मन्त्रालयले जनाएको छ ।

काठमाडौं उपत्यकामा ७ किलोमिटरसम्म चढ्ने वित्तिकै सार्वजनिक यातायामा १९ रुपैयाँ भाडा लाग्नेमा बिहिबारदेखि भने १ रुपैयाँ घटेर चढ्ने वित्तिकै १८ रुपैयाँ भाडा लाग्ने छ । यसअघि प्रदेशमा ११ जेठमा भाडा समायोजन गरिएको थियो ।