राष्ट्रिय सभामा सत्तापक्ष र प्रतिपक्षबीच भाँडभैलो,बैठक शुक्रबारसम्म स्थगित्

काठमाडौं । नेकपा एमालेले राष्ट्रिय सभा बैठकमा आजपनि अवरोध गरेको छ ।

बुधबारको बैठकमा समसामयीक विषयमा सबै दलका सांसदहरुले आफ्नो धारणा राखेपछि अध्यक्ष गणेशप्रसाद तिमल्सिनाले कार्यसूचीमा प्रवेश गराउन खोजेपछि एमाले सांसदहरुले विरोध जनाएका छन् ।

एमाले सांसदहरुले उठेर विरोध जनाएपछि अध्यक्ष तिमलिसनाले नेकपा एमालेकी सांसद विमला घिमिरेलाई बोल्न समय दिएका थिए । अध्यक्षले समय दिएपछि बोलेकी घिमिरेले सुन प्रकरणमा उच्चस्तरीय छानविन समिति नबनेसम्म सदन अगाडि बढ्न नसक्ने बताईन ।

एमाले सांसद घिमिरेले बोलिरहँदा नेपाली कांग्रेसका सांसदहरुले उठेर विरोध गरेपछि बैठकमा भाँडभैलो मच्चिएको छ । सांसद घिमिरेले सुन प्रकरणमा सत्तापक्षकै सांसदले अर्थमन्त्री र गृहमन्त्रीको संलग्नता छ भनेर बोल्नुभएको छ भनेपछि कांग्रेस सांसद रमेशजंग रायमाझीले आपत्रि जनाए । उनले एमाले सांसदले बोलेको कुरा तथ्यहीन रहेको कारण रेकर्डबाट हटाउन माग गरे । उनले कार्यव्यवस्था समितिको बैठमा भएको सहमति विपरित बोल्न नपाईँने भन्दै नियमापत्ति जनाए ।

अध्यक्ष तिमल्सिनाले पटक-पटक सदन सूचारु गरेर अगाडि बढ्न प्रमुख प्रतिपक्षी दल नेकपा एमालेलाई आग्रह गरेपनि सफल हुन सकेनन् । एमालेले निरन्तर अवरोध गरेपछि साउन २६ गते शुक्रबार विहान ११ बजेसम्म बैठक स्थगितको घोषणा गरे ।