गृहमन्त्री परिवर्तन सामान्य कुरा हो : कांग्रेस नेता

काठमाडौं । नेपाली कांग्रेसका नेता आनन्दप्रसाद ढुंगानाले कोशी प्रदेशमा नेकपा एमालेसँग मिलेर सरकार बनाउने सम्भावना नदेखेको बताएका छन् ।

‘नेपाली कांग्रेस लोकतन्त्रमा विश्वास गर्ने दल हो । सर्वोच्च अदालतको निर्णय स्वीकार गर्नैपर्छ । कोशी प्रदेशमा एमालेले उपसभामुखलाई अनुपस्थित गराएर अस्थिरता निम्त्याउने खेल खेल्यो, त्यो खतरनाक छ । हाम्रो पार्टी सभापतिले प्रदेश सरकारलाई स्थिरता दिन कोसिस नगर्नुभएको होइन । परिस्थिति अनुकूल हुन सकेन । जहाँसम्म एमालेसँग मिलेर सरकार बनाउने कुरा छ, अहिले नै त्यो सम्भावना देख्दिनँ,’ नेपाली रेडियो नेटवर्कको कार्यक्रम ‘नेपाली बहस’का लागि पत्रकार ऋषि धमलासँग ढुंगानाले भने ।
उनले कांग्रेस सहमहामन्त्री महेन्द्र यादवमाथिको सांघातिक आक्रमण कहीं न कहीं गणतन्त्र र संविधान सिध्याउने षडयन्त्र भएको टिप्पणी गरे । साथै उनले उक्त घटना २००७ सालपछि खुकुरी दलले बीपी कोइरालालाई सिध्याउन गरेको षड्यन्त्रसँग तुलना गरे ।

कांग्रेस नेता ढुंगानाले आफ्नो पार्टी तत्काल सरकार परिवर्तनको पक्षमा नरहेको पनि स्पष्ट पारे । उनले थपे, ‘नेपाली कांग्रेस कुनै पनि मानेनमा देशमा अस्थिरता चाहँदैन । त्यसैले हामी सरकार परिवर्तनको पक्षमा छैनौं । यसलाई नै स्थिर र व्यवस्थित बनाउनुपर्छ भन्ने पक्षमा छौं ।’

अब गृहमन्त्री परिवर्तन हुन लागेको हो भन्ने प्रश्नमा ढुंगानाले भने, ‘मन्त्रीमण्डल परिवर्तन सामान्य कुरा हो । समय समयमा भइरहेकै हुन्छ । तर यसै कारण गठबन्धन टुट्ने परिस्थिति बनेको छैन ।’
अर्को प्रसंगमा नेता ढुंगानाले चिनियाँ राजदूतले नेपालको स्वाधीनता र सार्वभौमसत्तामा हस्तक्षेप गर्न नमिल्ने जिकिर गरे । उनले भने, ‘भारत र चीनले हामीलाई सहयोग गर्नु नराम्रो कुरा होइन । तर सहयोगका नाममा नेपालको स्वाधीनता र सार्वभौमसत्तामा हस्तक्षेप गर्न मिल्दैन । नेपाल सार्वभौम र स्वाधीन मुलुक हो । हामीले आफ्नो हितमा काम गर्छौं । दुवै देशसँग समदूरीको सम्बन्ध राख्दछौं ।’