रौतहटको चन्द्रनिगाहपुर - गौर सडकखण्डमा चक्काजाम

रौतहटको चन्द्रनिगाहपुर – गौर सडकखण्डमा चक्काजाम

जानकारी केन्द्र

२०८०, पुष, १८

रौतहटको चन्द्रनिगाहपुर – गौर सडकखण्डमा चक्काजाम

रौतहट । रौतहटको चन्द्रनिगाहपुर–गौर सडकखण्डमा स्थानीयले चक्काजाम गरेका छन् । हुलाकी राजमार्ग अन्तर्गतको बडहरवा पुल समयमा नबनेको भन्दै स्थानीय बासिन्दाले चक्काजाम गरेका हुन् ।

हुलाकी राजमार्ग अन्तर्गत पर्ने बागमतीको बढहर्वा पुल तत्काल बन्नुपर्ने माग राख्दै स्थानीय बासिन्दाले चन्द्रनिगाहपुर–गौर सडकखण्डको बम नहरमा सवारी साधन अवरुद्ध गरेर चक्काजाम गरेका हुन् ।

उनीहरूले आज दिउँसो करिब डेढ बजेबाट सो स्थानमा चक्काजाम गरेका हुन् । चक्काजामका कारण चन्द्रनिगाहपुर–गौर सडकखण्डमा चल्ने सवारी साधन अवरुद्ध भएका छन् । पप्पु कन्स्ट्रक्सनले पुल बनाउन ठेक्का लिएको थियो ।

रौतहटको यमुनामाई गाउँपालिका, दुर्गा भगवती गाउँपालिका र राजदेवी नगरपालिकाका स्थानीय बासिन्दाले बम नहरमा जम्मा भएर पुल समयमै बन्नुपर्ने माग राख्दै चक्काजाम गरेका हुन् ।

रौतहटको क्षेत्र नम्बर १ का प्रदेश सांसद नागेन्द्र शाहसहितका स्थानीय बासिन्दाले चक्काजाम गरेपछि चन्द्रनिगाहपुर–गौर सडकखण्डमा सवारी आवागमन अवरुद्ध भएको हो ।