आगलागीबाट विभिन्न धनमाल जलेर नष्ट्

काठमाडौं । 

देशका विभिन्न ठाँउमा आगलागीबाट विभिन्न धनमाल जलेर नष्ट् भएको नेपाल प्रहरीले बताएको छ ।  झापा, बुद्धशान्ति गाउँपालिका-६ चुल्ठे पाखा गाउँ बस्ने ५६ वर्षीय सुर्य सुनुवारको घर र भान्सा घरमा मंगलबार बिहान आगलागी हुँदा २ वटा घर, अन्नपात, भाडावर्तन, लत्ताकपडा, काठको सामान बनाउन प्रयोग हुने मेसिनहरु र काठ समेत पूर्णरूपमा जलेर करिब १० लाख रूपैयाँ बराबरको धनमाल नष्ट भएको नेपाल प्रहरीले बताएको छ ।

नेपाल प्रहरीले बताए अनुसार  ईलाम नगरपालिका-५ धारापानीस्थित घनेन्द्र मुखियाको घर, किराना पसल र डेरी उद्योगमा विद्युत सर्ट भई मंगलबार दिउँसो आगलागी हुँदा घर, किराना पसल र डेरी उद्योगमा रहेका सरसामान जलेर करिब ८६ लाख २२ हजार रूपैयाँ बराबरको धनमाल नष्ट भएको छ ।

यस्तै गरेर पर्सा, ठोरी गाउँपालिका-४ गोपीबस्ती बस्ने पवन अग्रवालको ऊखुबारीमा मंगलबार दिउँसो आगलागी हुँदा करिब १० लाख १५ हजार रूपैयाँ बराबरको ऊखु जलेर नष्ट भएको नेपाल प्रहरीले पनि  जनाएको छ   ।

त्यस्तै मोरङ, बिराटनगर महानगरपालिका-१६ स्थित हाल बन्द अवस्थामा रहेको बिराटनगर पुरानो जुटमिलको स्वप्नर ब्लिचिङ डिपार्टमा मंगलबार राति आगलागी हुँदा ३ वटा मेसिन आंशिक रूपमा र कच्चा पदार्थ पूर्णरूपमा जलेर करिब २० लाख रूपैयाँ बराबरको धनमाल नष्ट भएको बताएको  छ ।

यस्तै गरेर  दोलखा, बिगु गाउँपालिका-४ लादुक बस्ने फारम बहादुर वलीको घरमा गएराति आगलागी हुँदा अन्नपात, लत्ताकपडा, भाडावर्तन र नगद ५० हजार रूपैयाँ जलेर करिब ३ लाख ५० हजार रूपैयाँ बराबरको धनमाल नष्ट भएको साथै ललितपुर, महालक्ष्मी नगरपालिका-४ इमाडोल टेम्पो पार्क नजिक रहेको बिकाश श्रेष्ठको काठ गोदाम र फर्निचरमा गएराति आगलागी भएको छ । क्षतिको विवरण हाल खुलेको छैन । प्रहरीले स्थानीय बासिन्दा र दमकलको सहयोगमा आगलागी नियन्त्रणमा लिनुको साथै यस सम्बन्धमा आवश्यक अनुसन्धान गरिरहेको जनाएको  छ ।