विभिन्न स्थानमा आगलागीबाट धनमाल जलेर नष्ट

काठमाडौं । देशका विभिन्न ठाँउमा आगलागीबाट विभिन्न धनमाल जलेर नष्ट भएको नेपाल प्रहरीले बताएको छ । सुर्खेत, सिम्ता गाउँपालिका-२ काफलकोट जिवन ज्योती माध्यमिक विद्यालयको स्टोर रूममा बिहीबार राति आगलागी फर्निचर, कम्प्युटर १३ थान, सेनिटरी प्याड ३३ बोरा पूर्णरूपमा जलेर करिब ४० लाख रूपैयाँ बराबरको धनमाल नष्ट भएको नेपाल प्रहरीले बताएको छ।

नेपाल प्रहरीले बताए अनुसार प्यूठान, स्वर्गद्धारी नगरपालिका-७ तापा बस्ने डमे कुमालको घरमा विद्युत सर्ट भई बिहीबार बेलुकी आगलागी हुँदा अन्नपात, लत्ताकपडा, भाँडावर्तन जलेर करिब ८ लाख रूपैयाँ बराबरको धनमाल नष्ट भएको छ । यसैगरी सिन्धुपाल्चोक, मेलम्ची नगरपालिका-१० बगुवा बस्ने राज कुमार श्रेष्ठको गोठमा बिहीबार राति आगलागी हुँदा करिब ४ लाख ५० हजार रूपैयाँ बराबरको धनमाल जलेर नष्ट भएको नेपाल प्रहरीले जनाएको छ ।

त्यस्तै गरेर रोल्पा, सुनिलस्मृति गाउँपालिका-३ मिझिङ बस्ने दुज बहादुर रोकाको गोठमा बिहीबार राति आगलागी हुँदा करिब २ लाख ९० हजार रूपैयाँ बराबरको धनमल जलेर नष्ट भएको नेपाल प्रहरीले बताएको छ । प्रहरीले स्थानीय बासिन्दाको सहयोगमा आगलागी नियन्त्रणमा लिनुको साथै यस सम्बन्धमा आवश्यक अनुसन्धान गरिरहेको जनाएको छ।