गाडी दुर्घटनामा परि भारतमा ७ नेपालीको मृत्यु

काठमाडौँ। भारतको उत्तराखण्डमा गाडी दुर्घटनामा परी ७ नेपालीको मृत्यु भएको छ। उत्तराखण्डस्थित नैनिताल जिल्लामा सोमबार राति गाडी दुर्घटना हुँदा ७ नेपालीसहित ८ जनाको मृत्यु भएको हो।

सोमबार राति नै नैनितालको बेतालघाट नजिकै गाडी सडकबाट १५० मिटर तल खसेको टाइम्स अफ इन्डियाले जनाएको छ।

समाचारका अनुसार मृतक सबै महेन्द्रनगरका रहेको जनाइएको छ। दुर्घटनापछि स्टेट डिजास्टर टिम (एसडिआरएफ) को टोली घटनास्थलमा पुगी ८ जनाको शव निकालेको थियो। मृत्यु हुनेहरु सबै जल जीवन मिसनमा कार्यरत रहेका थिए । उनीहरुको सनाखत समेत भइसकेको छ।

मृत्यु हुनेहरुमा नेपालीहरूमा ५० वर्षीय विश्राम चौधरी, ४५ वर्षीय धिरज, ४० वर्षीय अनन्तराम चौधरी, ३८ वर्षीय विनोद चौधरी, ५५ वर्षीय उदयराम चौधरी, ४५ वर्षीय तिलक चौधरी र ६० वर्षीय गोपाल बस्नेत छन्।