अध्ययनका लागि एक महिनामा विदेशियो १४ अर्ब ३१ करोड

काठमाडौं । देशमै सुविधा सम्पन्न विश्वविद्यालय र कलेजहरू रहे पनि अध्ययनका लागि विदेशिने क्रम घट्नुको साटो झन् बढ्दै गएको देखिन्छ। चालु आर्थिक वर्षको पहिलो महिनामा मात्रै १४ अर्ब ३१ करोड रुपैयाँ बराबरको रकम शिक्षाका लागि विदेशिएको नेपाल राष्ट्र बैंकले सार्वजनिक गरेको विवरणमा उल्लेख छ।

गत आवको सोही अवधिमा शिक्षातर्फ १४ अर्ब ९६ करोड खर्चिएको थियो। यसरी हेर्दा गत वर्षको तुलनामा थोरै कमी भए पनि रकम अझै उच्च स्तरमै रहेको देखिन्छ। त्यस्तै, चालु आवको पहिलो महिनामा सेवा खाताअन्तर्गत भ्रमण व्यय २.८ प्रतिशतले घटेर २१ अर्ब ७० करोड पुगेको छ। अघिल्लो वर्षको सोही अवधिमा यो व्यय २२ अर्ब ३२ करोड रहेको थियो।

समीक्षा अवधिमा खुद सेवा आय १३ अर्ब ३९ करोड घाटामा रह्यो। अघिल्लो वर्ष यस अवधिमा यो घाटा १५ अर्ब छ करोड थियो। तर, भ्रमण आय भने १२.७ प्रतिशतले बढेर पाँच अर्ब ३८ करोड पुगेको छ, जुन अघिल्लो वर्ष चार अर्ब ७७ करोड थियो।

विशेषज्ञहरूले शिक्षा र भ्रमणतर्फको उच्च खर्चलाई बाह्य क्षेत्रको चापको प्रमुख कारण मान्दै आएका छन्।