स्थगित भएको कक्षा १२ को मौका परीक्षा ७ र ८ गते तोकियो

काठमाडौं । स्थगित कक्षा १२ को मौका ( पूरक ) परीक्षाको नयाँ तालिका सार्वजनिक गरिएको छ। यसअघि भदौ २८ र २९ गतेका लागि तय गरिएको परीक्षा जेन–जी आन्दोलन हिंसात्मक भएपछि स्थगित गरिएको थियो।

राष्ट्रिय परीक्षा बोर्ड, परीक्षा नियन्त्रण कार्यालय कक्षा ११ र १२ ले सार्वजनिक गरेको नयाँ तालिका अनुसार मौका परीक्षा असोज ७ र ८ गते सञ्चालन हुने छ।

असोज ७ गते अनिवार्य अंग्रेजी (००४१) विषयको परीक्षा हुनेछ। त्यस्तै, एक विषयमा मात्र परीक्षा दिने परीक्षार्थीका सबै विषय र दुई विषयमा परीक्षा दिने परीक्षार्थीका लागि आफूले दिने विषयहरुमध्येको सानो कोड भएको विषयको परीक्षा सोही दिन हुनेछ। अनिवार्य अंग्रेजी र नेपाली दुवै विषयमा परीक्षा दिने परीक्षार्थीले भने पहिलो दिन अंग्रेजी र दोस्रो दिन नेपालीको परीक्षा दिनुपर्नेछ।

असोज ८ गते दुई विषयमा परीक्षा दिने परीक्षार्थीका लागि आफूले दिने विषयहरुमध्येको ठूलो कोड भएको विषयको परीक्षा हुने छ। यो दिन अंग्रेजी विषयको परीक्षा भने हुने छैन ,  किनभने अंग्रेजीको परीक्षा पहिलो दिन ( असोज ७ गते ) नै तय गरिएको छ।