माग बढेसँगै अण्डाको मूल्य पनि बढ्यो, अब कति ?

काठमाडौं । अण्डाको मूल्यमा वृद्धि भएको छ । माग बढेसँगै अण्डाको मूल्य पनि क्रमशः बढ्दै गएको हो। नेपाल लेयर्स कुखुरापालक संघले आजदेखि लागू हुने गरी अण्डाको मूल्यमा वृद्धि गरेको हो । संघका अनुसार ठूलो अण्डा (३० वटा) को एक क्रेटको फार्म मूल्य ४९५ रुपैयाँ पुगेको छ । यसअघि ठूलो अण्डा ४६५ रुपैयाँ प्रतिक्रेटमा बिक्री हुँदै आएको थियो, जसअनुसार मूल्य ३० रुपैयाँले बढेको हो ।

यस्तै, मझौला अण्डाको फार्म मूल्य ४७५ रुपैयाँ कायम गरिएको छ । यसअघि मझौला अण्डा ४४५ रुपैयाँ प्रतिक्रेटमा बिक्री हुँदै आएको थियो । संघका अनुसार गत मङ्सिरमा अण्डाको मूल्य हालसम्मकै उच्च बिन्दुमा पुगेको थियो । त्यस समयमा ठूलो अण्डा प्रतिक्रेट ५६५ रुपैयाँ र मझौला अण्डा ५५० रुपैयाँमा बिक्री भएको थियो ।

नेपाल लेयर्स कुखुरापालक संघका अध्यक्ष विनोद पोखरेलले निर्वाचनको माहोल बन्नु, निर्वाचनसँगै सीमा क्षेत्रमा कडाइ हुनु र माग बढ्नु अण्डाको मूल्य वृद्धिका मुख्य कारण भएको बताए । संघका अनुसार अण्डाको उत्पादन लागत प्रतिगोटा १९ रुपैयाँ १२ पैसा पर्छ । यसअनुसार किसानको लागत मूल्य प्रतिक्रेट ५७४ रुपैयाँ ६ पैसा पर्न आउँछ ।

संघले बजारको अवस्थाअनुसार अण्डाको समर्थन मूल्य निर्धारण गर्दै आएको छ ।