पेटसँग जोडिएका यी समस्या, गम्भीर रोगका लक्षण हुन सक्छन् ?

काठमाडौं: हामी कतिपय समयमा स्वास्थ्यसँग जोडिएका साना समस्यालाई सामान्य ठानी बेवास्ता गर्छौँ । आम मानिसले पेट दुख्ने, सुन्निने, बारम्बार पिसाब लाग्ने आदि लक्षणहरू वास्ता गरिरहेका हुँदैनन् । यस्तो सामान्य लाग्ने लक्षण ठुला रोगका संकेत पनि हुन सक्छन् । यहाँ खतरा हुन सक्ने यस्ता केही लक्षणलाई प्रस्तुत गरिएको छ

पेटमा ऐंठान
खाना खाने बित्तिकै पेट बटारिए जस्तो हुनु क्रोहन रोगको लक्षण हो । यो पाचन प्रणालीमा हुने जलनका कारण हुने गर्छ । बिरामी व्यक्ति सक्रिय हुँदा यस्तो समस्या झन बढेर जान्छ । यसले गर्दा पखाला चल्ने, जोनी दुख्ने तथा वजन घट्ने जस्ता समस्या आउँछन् ।
दिसामा रगत आउनु
पाइल्सका कारण पनि दिसामा रगत आउने गर्छ । यदि तपाईँको दिसामा रगत देखा परे यसको बिलकुलै नजरअन्दाज नगर्नुहोस् । तुरुन्त चिकित्सकको सल्लाह लिनुपर्छ । पाइल्सका अलवा पेटको क्यान्सर पनि हुन सक्छ । त्यसैले यसलाई कदापि नजरअन्दाज गर्नु हुँदैन ।

बारम्बार पखाला चल्नु
तपाईँलाई केही दिनसम्म लगातार पखाला चलेको छ भने यो पेटको संक्रमणका कारण हुन सक्छ । यसबाट तपाईँलाई इरिटिएबल बोवेल सिन्ड्रोम हुन पनि सक्छ । यो संक्रमण थाइराइड गडबडी तथा ‘फुड पोइजन’ का कारण हुन सक्छ ।

पेट सुन्निनु
केही खानेबित्तिकै पेट फुल्ने वा सुन्निे भयो भने यो खतराको संकेत हुन सक्छ । यसको बेवास्ता गर्नु हुँदैन । पेटभित्र भएका कोषिकाको वृद्धि, संक्रमण वा हर्निया जस्ता कारणले खाएका खानेकुरा पच्दैन । यसले गर्दा पेट सुन्निने, पेट फुल्ने, ग्यास भरिने आदि हुन्छ । यस्ता समस्या भएमा तुरुन्त चिकित्सकसँग परामर्श लिनुपर्छ ।

पेटको मुनिको दुखाइ
पेटको मुनि दाहिने भागमा एक्कासी सहन नसक्ने गरी दुखाइ भए त्यो एपेन्डिसाइटिस हुन सक्छ । धेरैजसो दुखाइ नाभी क्षेत्रबाट सुरु हुन्छ । त्यसपछि पेटको दायाँतिर दुखाइ सर्ने गर्छ ।

भोक लाग्दा पेट दुख्नु
पेटमा भएको घाउका कारण दुखाइ हुने गर्छ । यो भोक लाग्ने बित्तिकै दुख्न सुरु हुन्छ । यो दुखाइ अलिअलि गर्दनमा पनि महसुस हुने गर्छ ।

बान्तामा रगत देखिनु
बान्तामा रगत देखिनु गम्भीर रोगको लक्षण हुन सक्छ । त्यसैले यस्तो भएमा सावधान हुनुपर्छ । यस्तो हुनुको कारण आँत वा पेटमा भएको घाउ हो । धेरैजसो यस्तो समस्या औषधी सेवनपछि निको हुन्छन् । तर चिकित्सकको सल्लाहबिना औषधी सेवन गर्नु हुँदैन ।

पेटको माथिल्लो भागमा दुखाइ
पेटको माथिल्लो भागमा एक्कासी दुखाइ हुनुको कारण गलब्लागर अट्याक हो । यो पित्तमा हुने पथरीका कारण पित्त नलीमा रोकावट हुँदा हुने गर्छ ।

पेट भरिए जस्तो हुनु
कम खाना खाँदा पनि धेरै खाएजस्तो पेट भरिनु राम्रो होइन । यो अल्सर र ग्यास्ट्रिकका कारण हुन सक्छ । यसलाई बेवास्ता गर्दै लगिए यो पेटको क्यान्सरसम्म हुन सक्छ ।