भारतमा एकै दिन थपिए दुई लाख संक्रमित, कतिले गुमाए ज्यान ?

एजेन्सी । भारतमा एकै दिन २ लाखको हाराहारीमा कोरोना भाइरसका संक्रमित थपिएका छन् । गत २४ घण्टाभित्र त्यहाँ एक लाख ९९ हजार ५ सय ६९ जना नयाँ संक्रमित थपिएका हुन् । त्यहाँ हालसम्म कोरोना संक्रमितको संख्या एक करोड ४० लाख ७० हजार ८ सय ९९ पुगेको छ । कुल संक्रमित संख्याका आधारमा भारत दोस्रो स्थानमा रहेको छ ।

विश्वमा कुल संक्रमितका आधारमा अगाडि रहेको अमेरिकामा तीन करोड २१ लाख ४९ हजार २२३ संक्रमित रहेका छन् । तेस्रोमा रहेको ब्राजिलमा भने एक करोड ३६ लाख ७७ हजार ५६४ संक्रमित रहेका छन् । दुबै देशमा ८० हजारको हाराहारीमा नयाँ संक्रमित थपिएका छन् ।

उक्त अवधिमा एक हजार ३७ जनाको ज्यान गएसँगै कोरोना संक्रमणका भारतमा मृत्यु हुनेको कुल संख्या एक लाख ७३ हजार १५२ पुगेको छ । भारतमा दैनिक संक्रमणको दर उच्च बन्दै गएको छ । जुन गत २४ घण्टामा थपिएको संक्रमित संख्याले पनि देखाउँछ । संक्रमितमध्ये एक करोड २४ लाख २६ हजार १४६ जना निको भइसकेका छन् भने १४ लाख ७१ हजार ५९२ सक्रिय संक्रमित रहेका छन् ।