जग्गा धितोमा राखेर ऋण लिन नपाइने

काठमाडौं । अब जग्गा धितोमा राखेर ऋण लिन नपाइने जनाइएको छ ।

भुमि व्यवस्था तथा सहकारी गरिबी निवारण मन्त्रालयले तोकिएको मापदण्ड अनुसार वर्गीकरण भएपछि मात्र बैंक, वित्तिय संस्था वा सहकारी संस्थाबाट जग्गाको धितो वा बन्धक पारित गर्न निर्देशन दिएको छ । त्यस्तै, मन्त्रालयले राष्ट्रिय भुमि आयोग, भुमि व्यवस्थापन तथा अभिलेख विभाग र नापी विभागलाई पत्राचार गर्दै चार किल्ला खुलाई कृषि क्षेत्र नतोकेसम्म जग्गाको कारोबार नगर्न आदेश दिएको छ ।

यसैगरी, मन्त्रालयले जारी गरेको निर्देशनमा खेती योग्य जमिन वा कृषि योग्य नभएको, कुन प्रयोजनको लागि हो सो वर्गीकरण गर्नुपर्ने र सोही वर्गीकरणको आधारमा मात्र स्थानीय तहले कित्ताकाट प्रयोजनको लागि सिफारिस गर्नुपर्ने उल्लेख छ ।

तोकिएको मापदण्ड अनुसार वर्गीकरण भएपछि मात्र बैंक, वित्तिय संस्था वा सहकारी संस्थाबाट जग्गाको धितो वा बन्धक पारित गर्नुपर्ने निर्देशन जारी गरिएको छ । मन्त्रालयले कृषि क्षेत्रको रुपमा जग्गा वर्गिकरण नगरिएको जग्गा मालपोत कार्यालयले रोक्का नगरेपछि नयाँ निर्देशन जारी गरेको बुझिएको छ ।