कंगो: शान्ति सेनामाथि आक्रमण

काठमाडौं । कंगोमा संयुक्त राष्ट्रसंघविरूद्ध प्रदर्शन गरिरहेकाहरूले शान्ति सेनाको क्याम्पमा पनि आक्रमण गरेका छन् ।

प्रदर्शनकारीहरूले मंगलबार कंगोको उत्तरी क्षेत्रमा पर्ने किभु प्रान्तमा रहेको क्याम्पमा आक्रमण गरेका थिए । सेनाका प्रवक्ता नारायण सिलवालले त्यहाँ रहेका नेपाली सैनिक भने सुरक्षित रहेको बताएका छन् ।

सिलवालले भने, ‘हामी त्यहाँ रहेका नेपाली सैनिकसँग नियमित सम्पर्कमै छौं । त्यहाँको घटनालाई नजिकबाट नियालिरहेका छौं । उहाँहरू सुरक्षित रहेको जानकारी पाएका छौं ।’ आक्रमणमा दुई जना भारतीयसहित ३ शान्ति सैनिकको मृत्यु भएको छ । भारतीय विदेशमन्त्री एस जयशंकरले ट्वीटमार्फत् आफ्ना सैनिक मारिएकोमा दुख व्यक्त गरेका छन् । उनले भनेका छन्, ‘आक्रमणबाट दुई जना भारतीय सैनिकको मृत्यु भएको समाचारप्रति निकै दुखी छु । आक्रमणकारीलाई न्यायिक कठघरामा उभ्याउनैपर्छ ।’

यसैगरी, शान्ति सैनिकमाथिको आक्रमणलाई राष्ट्रसंघका महासचिव एन्टोनियो गुटेरसले भनेका छन् – शान्ति सेना माथिको आक्रमण युद्ध अपराध हो ।