ट्वीटरको कार्यालय अस्थायी रूपमा बन्द, कर्मचारीलाई कारण भनिएको छैन

काठमाडौँ । ट्वीटरले आफ्ना सबै कार्यालय भवनहरू अस्थायी रूपमा बन्द गर्ने भएको छ । कम्पानीका कार्यालय भवनहरू अस्थायी रूपमा बन्द हुने जानकारी ट्वीटरले कर्मचारीलाई गराएको अन्तर्राष्ट्रिय सञ्चारमाध्यमले जनाएका छन् ।

कार्यालय भवन नोभेम्बर २१ मा मात्रै खुल्ने उल्लेख कर्मचारीले पाएको सन्देशमा छ । तर कार्यालय बन्द गर्नुको कारण भने दिइएको छैन ।

ट्वीटरका नयाँ मालिक इलन मस्कले लामो समय काम गर्नका लागि तयार रहन वा छोड्न आदेश दिएपछि ठूलो संख्यामा कर्मचारीले राजीनामा दिइरहेका बेला ट्वीटरले कार्यालय बन्द गरेको हो ।

हालै मस्कले कर्मचारीहरुलाई लामो समय खटेर काम गर्न नसक्ने भए छोड्न भनेको खबर प्रकाशित भएको थियो । मस्कले किनेदेखि ट्वीटर एक पछि अर्को विवादमा छ ।