आसिफ शेखलाई ‘सीएमजे स्पिरिट अफ क्रिकेट’ अवार्ड

काठमाडौं । इङ्ग्ल्यान्डको मेरिलेबोन क्रिकेट क्लब (एमसीसी) ले ‘द २०२२ क्रिस्टोफर मार्टिन–जेनकिन्स (सीएमजे) स्पिरिट अफ क्रिकेट अवार्ड’ नेपालका विकेटकीपर ब्याटर आसिफ शेखलाई दिने घोषणा गरेको छ ।

क्रिकेट खेलाडीले देखाएको खेल भावनाको कदर गर्दै एमसीसीले बर्सेनि यो अवार्ड दिँदै आएको छ । खेल भावनाको कदर गरेको भन्दै यस वर्ष आसिफ शेखलाई अवार्ड दिन लागिएको हो ।

सन् २०२२ को फेब्रुअरीमा ओमानमा भएको चार देश सम्मिलित टी(२० अन्तर्राष्ट्रिय क्रिकेट शृङ्खला अन्तर्गत आयरल्यान्डसँगको खेलमा देखाएको खेल भावनाको कदर गर्दै एमसीसीले आसिफलाई अवार्ड दिएको हो ।

त्यस खेलमा नेपालका कमलसिंह ऐरीले गरेको १९ औँ ओभरको तेस्रो बलमा स्ट्राइकमा रहेका मार्क आदिरले रन लिने क्रममा नन स्ट्राइकबाट दैडिएका म्याकब्राइन कमलसँग ठोकिएर लडेका थिए ।

त्यस अवस्थामा कमलले दिएको बलमा आसिफसँग रनआउट गर्ने समय थियो । तर, उनले कमलसँग ठोकिएर रन लिन ढिलो भएका कारण म्याकब्राइनलाई रनआउट गरेनन् । त्यो खेलको भिडियोलाई लिएर विश्वभर नै चर्चा भएको थियो ।

आयरल्यान्डका कमेन्टेटर एन्ड्रियु लियोनार्डले शेयर गरेको भिडियोलाई १४ लाखभन्दा धेरैले हेरिसकेका छन् । आसिफको यही खेल भावनालाई लिएर विश्व क्रिकेटको सर्वोच्च निकाय आईसीसीले पनि सन् २०२२ को ‘स्पिरिट अफ क्रिकेट’ अवार्ड प्रदान गरेको थियो ।