बुद्धलाई सम्झदै १३ देशका मन्त्री नेपाल आउँदै

१३ देशका संस्कृतिमन्त्रीहरु नेपाल आउने भएका छन् । २५६० औँ बुद्ध जयन्ती तथा अन्तराष्ट्रिय बौद्ध सम्मेलनमा सहभागी हुनको लागि उनीहरु नेपाल आउँने भएका हुन् । ‘लुम्बिनी, नेपालः भगवान् बुुद्धको जन्मस्थल तथा दर्शनको उद्गमस्थल’ भन्ने नाराका साथ आगामी जेठ ७ र ८ गते नेपालमा अन्तराष्ट्रिय गोष्ठी तथा २५६० औँ बुद्धजयन्ती समारोह मनाईने भएको छ । गोष्ठी काठमाडौंमा हुने र जयन्ती लुम्बीनिमा मनाईने आयोजक मूल समारोह समितिले जनाएको छ ।

उक्त सम्मेलनमा १८ विदेशी र छ नेपाली गरी २४ वटा कार्यपत्र प्रस्तुत हुने जनाईएको छ । आज बसेको अन्तराष्ट्रिय बौद्ध सम्मेलन मूल समारोह समितिको बैठकमा बोल्दै प्रधानमन्त्री केपी शर्मा ओलीले सम्मेलनले संसारमा भएका बुद्धसम्बन्धी भ्रमलाई चिर्न सफल हुने बताए । बुद्धसम्बन्धिका भ्रमहरुलाई चिर्न पनि यो सम्मेलन आवश्यक रहेको उनको भनाई थियो ।

प्रधानमन्त्री ओलीले भने, ‘बुद्धसम्बन्धि कताकति भ्रम छ, त्यो कम प्रचार भएर भएको हो । अन्तराष्ट्रिय जगतसहितको सम्मेलनले भ्रम चिर्न मद्दत गर्छ र बुद्ध दर्शन नेपालबाट सुरु भएको प्रमाणित गर्छ ।’ प्रधानमन्त्री ओलीले बुद्धजयन्ती र अन्तराष्ट्रिय बुद्ध सम्मेलन मनाउन सिङ्गो नेपाल उत्साहित भएको पनि उल्लेख गरे । सम्मेलनमा राजनीतिज्ञ, सरकारी उच्च अधिकारी, धार्मिक संस्थाहरु सबैको एक्यबद्धता रहेको पनि स्पष्ट पारे । -नयाँपत्रिकाबाट